Footer

Baro, napaltogan, natay

MAGSINGAL, Ilocos Sur – Saan pay nga ammo ti kinasiasino ken motibo iti pannakapapatay ti maysa a baro iti katurodan ken langalang a paset ti Sitio Dinumaran, Barangay Patong, ditoy nga ili idi malem ti Mayo 25.

Ngem maysa nga anggulo a kitkitaen ti kapolisan no adda pannakainaig ti droga ti pannakapapatay ni Jimmy Tarangco y Ullero, 26, baro, ken residente iti nadakamat a lugar.

Segun iti maysa nga Abelina Usana y Baniaga, 29, idi agarup 2:55 ti malem ti nadakamat a petsa, badbaduanna dagiti annakna idi makangeg iti kanalbuong ti paltog.

Rimmuar iti balay ni Usana ket nakitana laengen ni Tarangco a nakadalutaytay ken daradara iti ummong dagiti pagtungo iti likudan ti balayda agarup 15 metros ti kaadayona iti daya ti balayda.

Segun iti report, dagus a natay ti biktima gapu iti sinagrapna a sugat iti makannawan a rupana.

Nakarekobre dagiti nagresponde nga elemento ti Magsingal police station ken personnel ti Crime Lab, Ilocos Sur Provincial Police Office iti crime scene iti maysa a plastic wad para iti kapsula ti shot gun ken selpon a Samsung ken Motorola.

Nakasukain pay dagiti inbestigadori iti maysa a heat sealed plastic sachet iti makannawan nga akinlikud a bulsa ti pantalon ni Tarangco.

Naipan iti crime lab office, Ilocos Sur PPO ti plastic wad ken heat sealed plastic sachet idinto nga adda iti kustodia ti Magsingal Police Station ti dua a cellular phones.

Agtultuloy ti panagimbestiga dagiti polis mainaig iti nasao a pammapatay.

Kabayatanna, idi agarup 3:30 ti malem ti Mayo 25, inreport ti Ilocos Sur District Hospital, Narvacan, Ilocos Sur iti kapolisan ti Sta. Maria ti kaadda ti pasienteda a biktima iti naiwawa a bala.

Nainaganan ti biktima a ni Evelyn Dacquel y Dusata, 24, awanan asawa, ken residente iti Barangay Gusing, Sta. Maria, Ilocos Sur.

Naammuan iti inbestigasion nga idi agarup 2:30 ti malem ti nadakamat a petsa, bayat ti panagtugaw ken panagilad da Ariel Caberto y Yagyagan ken ni Dacquel iti sirok ti Camanteles idi makangegda kadagiti kanalbuong manipud iti abagatan.

Idi bumangon koma ni Dacquel, nakarikna iti sakit iti akimbaba a paset ti makannawan a sakana ken nakitana nga agar-aruyoten iti dara.

Naitaray ti bikima iti ospital ngem rimmuar met laeng kalpasan ti pannakaagasna.

Nakarekobre dagiti polis iti nagiladan da Dacquel iti maysa a buli manipud iti cal. 45.

Iti pannakaisurat daytoy, di pay ammo ti kinasiasino dagiti nagpaputok.#

Comments are closed.