Footer

EDITORIAL: Pannakagun-od ti agnanayon a kappia

MANGNAMNAMA dagiti adu a Pilipino nga iti pannakaisaad iti akem ni Presumptive President-Elect Rodrigo Duterte ket magun-oden ti agnanayon a kappia iti sapasap a pagilian. Nabayagen a tartarigagayan dagiti adu nga umili ti pannakaigibusen ti nabayagen a rebelion dagiti kameng ti Communist Party of the Philippines ken New People’s Army tapno magibusanen ti aglima dekada a riribuk a nakaibuisan dagiti rinibu a biag.

Namnamaen dagiti Pilipino a gapu ti nasayaat a relasion da Duterte ken Jose Maria Sison, CPP Founding Chairman ket sigud a marugian ti pormal a saritaan-pangkappia a pangrugian ti addang nga agturong iti agnanayon a kappia iti nagbaetan ti gobierno ken dagiti rebelde a komunista. Maipalagip nga idi panawen pay laeng ti kampania ket naipakaammon iti publiko babaen ti media ti nasinged a panaglangen da Duterte ken Sison. Idi agbasbasa pay laeng ni Duterte iti kolehio sadiay Lyceum of the Philippines ket nagbalin a propesorna ni Sison a nangrugian ti nasayaat a relasionda agingga iti agdama. Idi panawen ti kampania, ni Duterte ti nagbalin nga instrumento ti pannakaruk-at dagiti kameng ti Philippine Army a hinostage dagiti rebelde a komunista. Naiparang  idi iti nasional s telebision ti nasinged a panagsarsarita dagiti dua iti computer internet wenno Skype.

Impalgaken ni Duterte ti gandatna a mangidiaya ti maysa kadagiti uppat a posision iti kabinetena apaman a maisaad a Presidente. Inyopresarna ti kina-sekretario ti Department of Environment and Natural Resources, Departmant of Agrarian Reform, Department of Labor and Employment ken Department of Social Welfare and Development. Impalgakna a madadaan isuna a mangdutok a sekretario ti pannakabagi ti CPP – NPA kas wagas ti pannakagun-od ti panagtalekda iti kinapudno ti sumaruno nga administrasion a mangtunton ti agnanayon a kappia, ken mamati isuna ti kinaepektibonto dagiti makakannigid a grupo kadagitoy a sektor.

Impalgaken da Sison ken dagiti kakaduana iti National Democratic Front a nabayagen nga agnanaed sadiay The Netherlands ti tarigagayda nga agawiden iti Pilipinas, ken magun-od ti agnanayon a kappia babaen ti panangibabadan kadagiti armasda ken makikaysadan iti gobierno. Maipalagip a ni Sison ket nagpaing sadiay The Netherlands idi mawayawayaan iti pagbaludan babaen ti Presidential Amnesty nga inted kenkuana ni Presidente Corazon Aquino idi maisaad iti turay babaen ti People’s Power EDSA Revolution idi 1986.

Manipud idi panawen ni Cory Aquino agingga iti agdama nga Administrasion ni Presidente Benigno Aquino III ket adda dagiti gannuat a mangtunton ti kappia a nangrugi kadagiti cease fire agreement iti nagbaetan ti puersa ti gobierno ken dagiti rebelde a komunista. Ngem adu dagiti makaigapu a napaay dagitoy a gannuat a puon ti agtultuloy a panagraranget dagiti tropa ti gobierno ken CPP – NPA.

Iti agdama nga Aquino administration, iti laksid dagiti panagraranget dagiti puersa ti gobierno ken rebelde a komunista ket naibutaktak ti nalimed a back-channel talk iti nagbaetan dagiti negosiador ti gobierno ken dagiti lider ti NDF. Naipadamag a nangibaon ni PNoy sadiay The Netherlands kadagiti delegado ti gobierno a nangaramid ken nakipagpinnirma ti katulagan a napauluan iti “Joint Agreement on the Resumption of the Formal Talks on the Peace Negotiation between GRP (Government of the Republic of the Philippines) and the NDF.” Naipadamag a nakapirma iti katulagan da Sison ken dagiti nangato a negosiador ti NDF a da Fidel Agcaoili, Vicente Ladlad ken Danilo Borja, ken dagiti nalimed a delegado ti gobierno a da Hernani Braganza, Jaime Aristotle Alip, Efren Moncupa ken Francisco Lara Jr. Naipadamag pay a napetsaan ti katulagan idi pay laeng Disiembre 8, 2014.

Dayta a katulagan ket ipakitana a ti Aquino administration ket madadaan a makikappia kadagiti rebelde a komunista. Ngem adu latta dagiti tubeng iti pannakagun-od ti agnanayon a kappia. Sapay koma ta ti Duterte administration ket agballigi a mamagkakappia ken mamagkaykaysa kadagiti Pilipino uray ania ti ideolohia ken pammati a pagtaktakderanda.#

Comments are closed.