Footer

Lakay, ginandatna a bagsolen ti kalib-in ti anakna

BANTAY, Ilocos Sur – Panangipagarup siguro daytoy a lakay a naggibusen ti pannakaipakat ti gun ban isu a nagtured a nagisakibot iti paltog ken nanggandat a mangbagkong iti kalib-in ti anakna idi malem ti Mayo 21.

Nakaala la ket ngarud ti sakit ti ulo ni Divino Padre y Bautista, 75, karpintero ken residente iti Barangay Paing, ta nakasuan iti panagsalungasing iti gun ban ken RA 10591 ken attempted murder gapu iti pananggandatna a mangbagkong  ken ni Maricar Viloria y Paculan, 28, kalib-in ti anakna a ni Warlito Padre y Madriaga, 44.

Kas maibatay iti report, napan da Warlito ken Maricar iti balay ni Divino tapno kolektaenda ti bingay ti lakay iti bayadan a koriente ket nadatnganda daytoy nga awan ti badona ken nakasakibot ti paltog iti siketna.

Idi nakita ida ti lakay, dagus a rimmuar iti balay sana inlemmeng ti paltog iti buntuon dagiti kayo.

Nasiputan da Warlito ken Maricar ti nangidulinan ti lakay iti paltog ket insukoda ken ni Kagawad Imelda Cortez y Belleza.

Idi aggawiden da Warlito ken Maricar, nasabatda ti lakay a nakaarmar iti Batangas knife ket ginandatna a bagsolen ni Maricar ngem ginammatan ni Warlito ti igam.

Naglibas ni Padre ngem natiliw dagiti polis a nangiwayat iti hot pursuit operation.

Naipaima kadagiti polis ti paltog ken Batangas knife para iti dokumentasion ken umisu a disposision.

Iti kaudian a report, naiyendorso iti opisina ti provincial prosecutor ti kaso ni Padre a panaglabsing iti RA 10591 mainaig iti Comelec gun ban ken attempted murder.#