Footer

Naglibas ni Kirat!

Sarita ni Salvador A. Espejo

(Maikatlo a paset)

 

Kalpasan ti apura a panangaldawmi iti maysa a bassit ngem nadalus a karinderia iti abay ti police station, imbilinko ken ni Fred a mapankami iti M and M Enterprises a pagpapaayan ni Mario Corpuz.

“Mabalin a kasaritak ni Mr. Vergara?” kinunak iti nalapsat a receptionist.

Nagtelepono ti receptionist. Pinastreknakami iti opisina ni Mr. Vergara.

“Anything I can do for you, Inspector?” kinuna ni Mr. Vergara.

“Maipapan ken ni Mario Corpuz, Mr. Vergara. I gather he is an efficient employee.”

“Wen, sarge. Mapagtalkan.”

“Kaano ti naudi a panagukagyo iti libro ti kompaniayo?”

“Idi tapos ti tawen. Apay kadi, Inspector?”

“Kayatko a maammuan no nadalus met la ti kuenta ni Mario Corpuz.”

“Nadalus ti kuenta ni Mario iti napalabas a tallo a tawen. Anything wrong, Inspector?”

“We are investigating a murder case, Mr. Vergara.”

“Ikkannak iti tallo nga aldaw a mangpasukimat iti libro ni Mario,” kinuna ni Vergara.

Nagyamanak iti manadier. Diakon nagbayag.

Kas inbestigador, kasapulan ti napintas a pannakilangenko kadagiti empleado ken agtrabtrabaho kadagiti pasdek-negosio iti siudad. Nadaras ti agala iti impormasion no kapaspasigam ida. Am-ammok ni Joselito Andap, ti security guard ti M & M Enterprises.

Indiayaak ni Andap iti sigarilio ket nanindikami.

“Damagko a pilio ni Mario Corpuz iti babai,” kinunak. “Agpayso kadi?”

Nagtalangkiaw ti guardia. “Off the record koma daytoy, sir,” kinunana iti nakapsut a timek. “Diak kayat ti maisarsarak.”

“Mangnamnamaka,” insungbatko.

“Adda kabit ni Mr. Corpuz. Lily ti naganna. Star dancer iti Greenfields.”

“Kasano nga ammom?”

“Mangmangegko nga ilaslastogna kadagiti kakaduana no mapanda aggiinom iti Greenfields,” kinuna ti guardia.

NAGMATTIDERAK iti ruangan ti Greenfields ket inwarasko ti panagkitak. Gumilapgilap dagiti nalidem a silaw. Iti salonan, kumkumpasan dagiti asmang ti naparagsit a tokar.

Nagtugawak iti suli. Nagorderak iti serbesa.

“Bakante ni Lily?” inamadko iti serbidor.

“Buenasmo, boss. Kapampanaw ti parokianona,” insungbatna.

Nagsenias ti serbidor. Madamdama, immasideg ni Lily. Napudaw. Gimmitara ti pammagina. Aginakbay ti banglona. Saan ngarud a nakakaskasdaaw nga ilaslastog ni Mario Corpuz a kabitna.

“Talaga gayam a nalapsatka,” kinunak.

“Adudan a nangisawang iti dayta,” inkatawana.

“Kas ken ni Mario Corpuz?”

“A-am-ammom ni Mario?” naglumen ti isemna.

“Ammomon ti napasamak?” binaliwak ti saritaan.

“Ti ania?”

“Napapatay ti asawa ni Mario Corpuz.”

“S-sino ti pimmatay?”

“Ni Kirat ti suspetsa. Am-ammom ni Kirat, saan kadi?”

“P-poliska kadi?” immatap ti matana.

Diak sinungbatan. Sinitsitak ti serbidor ket binayadak ti ininumko.

Nagsubliak iti nakaiparkingan ti nangisit a kotsek. Impusotko ti bagik iti abay ni Fred idinto a kinitak ti oras iti pungupunguak. Alas diesen iti rabii.

Nagpayubyobkami ken ni Fred bayat ti panaguraymi. Sangkataldiapko ti sanguanan ti Greenfields. No saan nga agkibaltang ti pattapattak, rummuar la ketdi ni Lily. Kayatko a takuaten no papananna.

Madamdama, tumalangkiaw ni Lily a rimmuar iti Greenfields. Nangsitsit iti taksi sa limmugan. Inseniasko ken ni Fred a surotenna ti taksi.

Pinanurnor ti taksi ti Quirino Boulevard sa simmalput iti Barangay Capangpangan ken nagpakannigid iti Barangay San Julian.

Narasayen dagiti malabsan a balbalay. Medio panipngeten ti aglawlaw ta agaaddayo dagiti poste ti elektrisidad.

Madamdama, masungadmin ti Sherlterville.  Addan sumagmamano a balay a naipatakder iti kabarbaro a subdivision.

Nagsardeng ti taksi iti batog ti kabarbaro nga apartment.

Imbilinko ken ni Fred a labsanmi ti balay. Impaigid ni Fred ti lugan iti asideg ti nagkurosan.

Dimsaagak saak nagsubli. Nagmattiderak iti asideg ti nakatangep a ruangan idinto a nagpaliiwak. Idi awan madlawko a karkarna, kimmalabkabak iti pagattao ti katayagna a kongkreto nga alad saak timmapuak iti uneg ti panglawaen a paraangan.

Nagtarukoyak nga immasideg iti balay. Simmiripak iti apagapaman a nakalukat a sarming a tawa. Nakatugaw ni Lily iti sopa idinto a di makatalna ti lalaki iti sangona. Idi maitangkarang ti rupana, napasagawisiwak iti nakapsut. Ni Mario Corpuz!

Nagsubliak iti lugan. Pagandaren koman ni Fred idi umaweng ti transmitter. Pinidutko ti auditibo.

“Naipiskoten ni Kirat iti Barangay San Pedro! Proceed to that place for reinforcement!”

Apaman a nakaruarkami iti Barangay San Julian, pinaaweng ni Fred ti sirena ket bimmanesbes ti lugan a nangpanurnor iti Barangay Capangpangan.

Simmalputkami iti Plaza Burgos. Pinaginayad ni Fred ti lugan ta tumuyutoy latta dagiti turista iti Heritage Village.  Ngem apaman a nakasikkokami iti Quezon Avenue, pinataray manen ni Fred ti patrol car agingga a natuparmi ti Simbaan a Bassit. Nagpakannawankami sakam tinarengteng ti kalsada nga agpalaud agingga a naung-potmi ti Barangay Ayusan ken Bulala.

Nagpakannigid ni Fred idi matuparmi ti Barangay San Pedro. Uray la naganit-it dagiti pilid idi isardeng ni Fred ti lugan iti likudan ti tallo a police car. Dimsaagak ket immabayak iti hepemi.

“Sumukokan, Kirat!” impukkaw ni Supt. Pinto. “Ikkandaka iti lima minutos a pawayway a sumuko!”

Nagsasaruno ketdi a kanalbuong ti insungbat ni Kirat. Nagkul-obkami.

Nagsardeng a nagpaputok ni Kirat. Nagari ti ulimek.

Imbilin ni hepe ti isasalikawkawmi ken ni Fred bayat ti panangpasukona ken ni Kirat.

Nagarudokkami ken ni Fred nga immasideg.

“Ultimatum daytoyen, Kirat! Sumukokan!” nangegmi ti pukkaw ni hepe.

“Saannak a sumuko!” insungbat ni Kirat ket nagpaputok manen.

Kellaat, nailukat ti tawa iti likud ti balay ket timmapuak ni Kirat a kagiddan ti panagpaputokna. Bimmaleskami a nagpaputok. Nakangegkami iti  asug a naggapu iti uneg ti inaladan.

Nagpaliiwkami. Madamdama, nagin-inayadkami a simrek iti inaladan. Babaen ti nakusnaw a lawag manipud iti poste iti nagkurusan, naaninaganmi ni Kirat a naidalutaytay iti asideg ti kamasetasan. Immasidegak. Ap-apputen ni Kirat ti barukongna. Kamkamatennan ti panagangesna.

“Kirat, apay a pinataymo ni Marietta Corpuz? intubongko ti saludsodko iti lapayagna.

Nagling-i ti ulo ni Kirat. Madamdama, nagsalungayngayen.

(Maigibusto)