Footer

4 kalding, natakaw iti pagpastoran

SAN JUAN, Ilocos Sur – Tallo a mannalon ti nagreport iti polis a natakaw iti tarakenda a kalding idi bigat ti Mayo 31.

Nagkukuyog a nagpulong iti police station ditoy a mapukpukaw dagiti kaldingda a nakawayway iti kataltalonan da Ronald Rapisura y Salvador, 44, naasawaan; Melford Siababa y Faraon, 25, naasawaan; ken Raquel Ramos y Arellano, 35, naasawaan, agpapadada a residente iti Barangay Sabangan, San Juan, Ilocos Sur.

Maysa a kalding ti natakaw ken ni Rapisura nga agbalor iti P2,000.00, dua a kalding nga agbalor iti P6,000.00 ken ni Melford, ken maysa a kalding nga agbalor iti P2,000.00 ken ni Raquel. Agpapada a kabayan dagiti napukaw a kalding.

Segun kadagiti biktima, nakawayway dagiti kalding iti pagpastoran a talon nga asideg iti balayda nga adda iti igid ti barangay road.

Maysa a Jong-jong Bunag, kalugaran met laeng dagiti tallo ti nagkuna a nakitana a nagsardeng ti maysa nga L300 van a maris dapo/nangisit iti asideg ti nakaiwaywayan dagiti kalding, maysa a lalaki ti dimsaag sana inlugan dagiti ayup. Kalpasanna, napegges nga immadayo ti lugan.

Iti pannakaisurat daytoy, di pay nabigbig ti nangitaray kadagiti kalding.#

Comments are closed.