Footer

EDITORIAL: Dagiti Kameng ti Gabinete ti Duterte Administration

IMPROKLAMAREN ti Kongreso a nagakem a National Board of Canvasser iti napalabas nga eleksion ti nangabak a Presidente ti Pilipinas a ni Davao City Mayor Rodrigo Duterte, ken ti nabutosan a Bise Presidente a ni Camarines Sur Representative Ma. Leonore Robredo.

Mangruginto nga agakem inton tengnga ti aldaw ti Hunio 30, 2016 da Duterte, Robredo ken dagiti amin a nangabak iti napalabas nga eleksion. Ngem inrakuraken ni Duterte dagiti napilina a kameng ti gabinetena. Impasingked ni Duterte nga amin a dagiti pinilina a miembro ti gabinetena ket napnoda iti integridad ket madadaan isuna a mangdepender kadakuada iti Committee on Appointment sadiay Kongreso.  Adu kadagiti napili a kameng ti gabinete ni Duterte ket dagiti am-ammon a nagan a sigud ken nabayagen a nagserserbi kadagiti naglabas nga administrasion, ken naggapu iti nagduduma a sektor nga addaan iti agsusupadi nga ideolohia. Kaaduanna pay dagiti taga-Mindanao ken dagiti nasinged iti nabutosan a Presidente.

Mapilaw kadagiti dadduma a napili ni Duterte a kameng ti gabinetena gapu ti pannakairamanda kadagiti naglabas a pagteng a nagdayyeg iti pagilian. Maysa kadakuada ni incoming Presidential Spokesperson Salvador Panelo gapu ti panagbalinna a sigud a legal counsel dagiti Pamilia Ampatuan nga akusado iti Maguindanao Massacre.  Makritkritikar pay ni incoming National Security Adviser Retired Gen. Hermogenes Esperon, sigud a Chief of Staff ti Armed Forces of the Philippines bayat ti “Hello Garci Scandal” idi panawen ni Pres. Gloria Arroyo.  Madildillaw pay ti pannakadutok a kameng ti gabinete dagiti awan wenno nakurang ti padasna nga agiggem kadagiti dadakkel nga ahensia ti gobierno wenno pribado a sektor. Mairaman kadakuada ni incoming Agrarian Reform Secretary Rafael Mariano nga inyendorso ti makakanigid a grupo, ken ni incoming Bureau of Customs Commissioner Ex Marine Captain Nicanor Faeldon ti Magdalo Group dagiti nagrebelde a soldado.     Inrakuraken ni Duterte a saanna nga ikkan ti akem iti gabinetena ni Robredo ta saan a nailanad dayta iti linteg ken saanna a kapartiduan iti Partido ng Demokratikong Pilipino – Lakas ng Bayan ta kameng ti Liberal Party ti nabutosan a Bise Presidente. Impaganetget pay ni Duterte a saanna a saanna a kayat a saktan ti rikna ti gayyemna a ni Sen. Ferdinand Marcos Jr. a kaingetan a nakabalubal ni Robredo. Inaklon ni Duterte a bigbigenna ti utang a naimbag a nakem iti daydi Pres. Ferdinand Marcos ta daydi amana ket sigud a kameng ti gabinete kabayatan ti umuna a termino ti sigud a Presidente.

Masayangan dagiti umili iti saan a pannakadutok ni Robredo iti posision iti gobierno ta sayang ti padasna ken ti maisusueldo kenkuana no agakem laeng a Bise Presidente nga awan ti naindaklan a trabaho kem akemna, ken agur-uray laeng a sumukat no mabakante ti kina-Presidente. Uray awan iti linteg, naipakadawyanen kadagiti naglabas nga administrasion a maikkan ti nangato nga akem ti Bise Presidente tapno saan a masayang ti pondo a busbosen ti opisinana ket saan nga agbalin a kasla reserba a pilid laeng.

Adda man dagiti pamilawan dagiti umili kadagiti dadduma a napili a kameng ti gabinete ni Duterte. Ngem kalinteganna ti mangpili kadagiti alter-ego wenno pannakabagina nga opisial ket no anianto ti aramiden ken magapuanan dagiti mangidaulo kadagiti departamento wenno ahensia nga idauloanda ket sungbatanto dayta ti Presidente kadagiti amin nga umili a Pilipino, saan laeng a dagiti nangbotos kenkuana.

Iti pannakadutok dagiti kameng ti gabinete a naggapu kadagiti nagduduma nga immun-una nga administrasion, ken dagiti rightist and leftist groups ket iyanninawna ti panagkaykaysa dagiti nabileg a puersa a timmulong iti kampania ni Duterte tapno magun-odna ti kangatuan a pagsaadan iti pagilian. Sapay koma ta dagiti agakem kadagiti nangato a saad ti gobierno manipud kadagiti nagsusupadi a sektor ket mapagkaykaysada met dagiti umili para iti pannakagun-od ti naan-anay a kappia ken panagdur-as ti Pilipinas. (Eden A. Alviar)