Footer

Naglibas ni Kirat!

Sarita ni Salvador A. Espejo

(Maudi a paset)

 

Immasideg ni Supt. Pinto sana pinennek no natayen ni Kirat.

“Good work, men,” kinunana. “Narisuttayon ti kaso.”

“Saan pay, sir,” kinunak ket imbagak ti suspetsak.

Nagkuretret ti muging ni Supt. Pinto idinto a pinulingling ti panunotna ti suspetsak.

“You have a point,” nagtung-ed Supt. Pinto idi agangay. “Follow it up.”

Inseniasko ken ni Fred nga adda papananmi.

“Sadino, bossing?” sinaludsodna.

“Iti ballistics section,” insungbatko.

Limmugankami ken Fred. Madamdama, impaigid ni Fred ti mobile car iti sango ti natayag a pasdek a nakaibalayan ti Ballistics. Immulikami. Nadatnganmi ni SPO4 Medrano a mangsirsirig iti mikroskopio  idinto a puspusiposenna ti maysa a bala.

Indissok iti sanguananna ti buli a naalami iti nakipinnaltogan ni Kirat.

““Idiligmo man iti slug a naala iti bagi ni Josie Corpuz,” kinunak.

Pinidut ti kapitan ti bala sana sinirig iti mikroskopio. Nabayag a pinuspusiposna ti buli.

“Maymaysa kadi a paltog ti naggapuanda?” inamadko.

“Saanda nga ag-match,” insungbat ni SPO4 a bulonna ti nagwingiwing.

Nupay rabiin,  nagteleponoak iti balay ni Mr. Vergara.

“Padispensa, manedier no nalukagko ti turogyo,” nakunak. “Naukagyon ti libro ni Mario Corpuz?”

“You’re right, Inspector, dakkel a kantidad ti nakaud ni Mario iti iggemna a kuarta,” kinuna ni Vergara.

“Agyamanak, Mr. Vergara,” nakunak. “Dakkel ti naitulongmo iti pannakarisut ti kaso.”

Awan ni Mario Corpuz iti pagtaenganna. Napankami iti Greenfields. Dua nga aldawen kano a saan a dimmap-aw iti beerhouse. Uray ni Lily, saan a nagreport iti Greenfields. Imbilinko ken ni Fred ti ipapanmi iti Sherlterville.

Imparada lattan ni Fred ti lugan iti sanguanan ti apartment. Nakakandado ti landok a ruangan.

“Poliskami! Luktanyo ti ruangan!” impukkawko.

Madamdama, nagangtan ti silaw iti salas sa iti ngatuen ti landok a ruangan. Inlukat ni Lily ti ridaw. Ngem dagus nga intangepna idi mailasinnakami.

“Luktanyo ti ruangan!” inulitko nga impukkaw.

Rimmuar ni Lily. Inlukatna ti ridaw.

“N-naidaw-askayo, Inspector,” kinunana.

Saanko a sinungbatan. Immunegak iti inaladan. Tinugtogko ti ridaw.

“Saankan nga aglemmeng, Corpuz,” impukkawko. Ammok nga addaka dita uneg.”

Naglitek ti serradura ti ridaw. Naitangkarang ni Corpuz.

“Aniaman ti gagaram, dimon la maipabigat, Inspector?” nakunana.

“Natayen ni Kirat,” nakunak ketdi.

“At last, nagpullon ti kriminal!”

“Saan a ni Kirat ti kriminal, Mr. Corpuz. Sika!”

“N-nadagsen ti pammabasolmo, Inspector.”

“Ammomin ti motibo ti pammapatay, Mr. Corpuz. Kabitmo ni Lily ket imbalayam. Intedmo amin a kayatna. Gapu iti dayta, nakakaudka iti kaha. Tapno malitupam ti nakaudmo, insegurom ni baketmo. Planom a patayen. Ngem naglibas ni Kirat ket panggepnakayo a balsen gapu iti panangliputyo kenkuana. Naisipmo a gundawaymon nga iwalin ni baketmo ket ni Kirat ti pangibuntuonam iti krimen.”

“Agpayso a nakakaudak iti iggemko a kuarta ngem saan nga umdas dayta tapno patayek ni baketko.”

“Kinapudnona, nagsuspetsaakon kenka iti aldaw ti pammapatay, Mr. Corpuz. No malagipmo, kinunam a binurak ti kriminal ti sarming tapno magaw-atna ti lelettatan ti ridaw iti uneg. Ngem iti panangamirisko, naiwarsi dagiti buong ti sarming iti ruar ti tawa ken iti dalan. Ania ti kayatna a sawen? Adda iti uneg ti balay ti nangburak iti sarming! Agdadata ngarud a nagulbodka. Sika ti nangburak iti sarming ket pinagparangmo nga aramid ni Kirat!”

“Agkarkarawaka iti angin, sarge!”

“Kinunam pay nga alas dose kinse idi sumangpetka iti balaymo ket nadatngam ni baketmo a naidasay. Pinaleknaka ni Kirat. Ngem kinaagpaysona, sika ti nangpalek iti ulom. Inaramidmo dayta tapno maiyadayo kenka ti suspetsa. Ngem malasmo, iti dayta a kanito, adda ni Kirat iti Magsaysay Village ket tallo a testigo ti nakasaksi iti panangitalawna iti motorsiklo ti maysa nga agtutubo.”

“S-saan a pudno dayta!” namigerger ti timek ni Mario Corpuz.

“Ngem daytoy ti mangsirut iti tengngedmo, Mr. Corpuz. Adda pamalpalatpatam iti ballistics? Tapno ammom, ti paltog ket kas met iti ramay nga agduma ti lemmana. Pinaamirisko ti buli a naala iti bagi ni baketmo ken ti buli a naiputok iti igam ni Kirat. Saanda nga agparis. Ngarud, saan a ni Kirat ti nangpaltog ken ni baketmo. Sika ti itudtudo dagiti pammaneknek!”

“Kunakto pay kenka!” imkis ni Lily.

“You fool! Agtalnaka! Dimo kadi maamiris a…”

Napaisemak. #