Footer

Opisial a nainbolbar iti illegal a droga, rumbeng a mapakatan nadagdagsen a kaso: Gov. Marcos

LAOAG CITY – Indagadag ni Governor Imee Marcos ti pannakaipakat iti nadagdagsen a pannusa kadagiti opisial ti gobierno a nainbolbar iti illegal nga aktibidad a kas iti droga.

Impeksa daytoy ti gobernadora kalpasan ti pannakaaresto ti maysa nga opisial ti ili a Pagudpud babaen ti maysa a search operation  nga insayangkat ti kapolisan iti pagtaenganna itay nabiit.

Kinuna ni Marcos a rumbeng a maipakatan iti nadagdagsen a kaso dagitoy nga opisial a nainbolbar iti droga iti baet a nangato ti puestoda iti gobierno.

Inaresto dagiti kameng ti Provincial Anti-illegal Drug Special Operation Task Group  ni Engr. Reynold Galat, municipal assessor ti Pagudpud, Ilocos Norte kalpasan a nakasamsamda bayat ti search warrant operation nga insayangkatda iti droga ken drug paraphernalia a pakairamanan ti 21.3 a gramo ti shabu iti pagtaengan ti nasao nga opisial.

Agserserbi a municipal assessor ni Galat iti nadakamat nga ili ken maibilang a maysa kadagiti top drug personalities iti daytoy nga ili.

Naipila metten ti maikanatad a kaso maikontra kenkuana.

Innayon ni Marcos a rumbeng laeng a sumango dagiti opisial a napudasdasan a naglabsing iti linteg iti nadagdagsen a pannusa ken awananda iti kalintegan nga agtugaw iti nangato a puesto agsipud ta dadaelenda ti dayaw ken integridfad ti serbisio ti gobierno.

Impatalged ni Marcos ti naan-anay a suportana iti Ilocos Norte Police Provincial Office (INPPO) iti kampania maikontra iti droga ken iti pannakatiliw dagiti big-time drug users ken pushers iti probinsia.

Maipalagip nga iti State of the Province Address 2015 ni Marcos, inyunay-unayna a kappia ken urnos ti umuna a kasapulan ti panagdur-as idinto nga inreportna a ti Ilocos Norte ti maysa kadagiti katalgedan a lugar iti pagilian.

Impanamnama pay ti gobernadora ti agtultuloy a panagtrabaho ti gobierno probinsial tapno masigurado ti talged ken seguridad ti probinsia babaen dagiti nadumaduma a kampania ti kapolisan maikontra iti droga ken kolorum a paltog. (Manipud iti report ni Jennifer T. Pambid, PGIN-CMO)