Footer

PDP – LABAN ken dagiti Kulibangbang iti Politika

PDP – LABAN KEN DAGITI KULIBANGBANG ITI POLITIKA

Komentario ni Eden A. Alviar

 

NASDAAW dagiti adu a Pilipino iti resulta ti eleksion iti pagilian idi Mayo 9, 2016 a nangitarayan ni Mayor Rodrigo Duterte, ti Partido ng Demokratikong Pilipino – Lakas ng Bayan, kadagiti nakabalubalna iti kina-presidente ta naikappeng ken sinuportaran ida dagiti napigsa a partido.

Inabak ni Duterte da Sec. Mar Roxas iti pito million a botos uray pay isu ti nangibayog ti Liberal Party ti agdama nga administrasion. Maikatlo met iti salisal ni Sen. Grace Poe nga uray nagipila ti kandidatura kas independiente a kandidato ngem sinuportaran isuna ti nabileg a partido a Nationalist People’s Coalition. Maikatlo laeng ti balubal ni Vice Pres. Jejomar Binay a nangitakder ti United Nationalist Alliace, ti maikadua a kangrunaan a partido-politikal iti pagilian iti agdama a panawen. Naudi met ni Sen. Miriam Defensor-Santiago a nangibayog ti People’s Reform Party.

Sakbay ti panangrugi ti kampania, natagtagibassit ti PDP–Laban no maidilig iti kabileg ti makinaria ti LP, UNA ken NPC. Ngem kalpasan ti panagbotos, intarayan ni Duterte dagiti amin a nakasalisalna ket timpaw a namimpinsan ti partido a nangadaptar kenkuana.

Naipakadawyanen kadagiti politiko a Pilipino ti panagalis-alisda kadagiti pakaikappenganda a partido para iti bukodda nga interes. Manamnama nga iti panagbalin ti PDP – LABAN a baro nga administration party ket umadunto manen dagiti politiko nga umakar iti daytoy a partido tapno masaluadan ti personal a pagimbagan dagiti politiko.

Manipud pay idi “Two Party System” mayataday ti 1935 Constitution ti nasursurot a wagas iti Pilipinas ket kadawyanen ti panagakar-akar dagiti politiko iti pakaikappenganda idi Nacionalista ken Liberal Party pay laeng dagiti kangrunaan a partido iti pagilian. Napakaro ti “political butterfly” kalpasan ti pannakaadaptar ti 1987 Constitution a nakaipalaonan ti “Multi-Party System” ti sistema ti politika iti pagilian.

Kalpasan ti 1992 National and Local Elections a nangabakan a Presidente ni Fidel Ramos babaen ti kabangbangon idi a Lakas – National Union of Christian Democrats – United Muslim Democrats, ket kellaat a pimmigsa dayta a partido ta nagaakar dagiti adu a politiko. Kellaat ti panagakar iti baro nga administration party dagiti kongresista iti Lakas – NUCD – UMDP ket nadominaran ti Kongreso gapu ti napasamak a “rainbow coalition” dagiti kongresista, senador ken dagiti lokal nga opisial.

Naulit manen ti kasta a panagaakar dagiti politiko iti partido idi mangabak a Presidente idi 1998 ni Joseph Estrada a nangibayog ti Partido ng Masang Pilipino. Ngem napadisi ni Estrada iti akem ket simmukat kenkuana ni Bise Pres. Gloria Macapagal-Arroyo ti Lakas – NUCD – UMDP, ket nagaakar manen dagiti adu a politiko iti administration party. Idi kampania ti eleksion idi 2010, nakapsut ti Liberal Party ni Benigno Aquino III. Ngem idi nangabak ni Aquino a Presidente, nagaakar manen dagiti nagadu a politiko iti baro nga administration party.

Apaman a makapagsapata ni Duterte a Presidente ti Pilipinas, manamnama a mangruginton ti panagaakar dagiti adu a politiko iti administration party. Agbalin manen ti PDP – LABAN a kasla nabanglo ken nasam-it a sabong nga araken dagiti adu a kulibangbang iti politika. Ania kadi daytoy naparegta a partido a manamnama nga araken manen dagiti politiko iti sapasap a pagilian?

Ti partido a PDP – LABAN ket resulta ti napagtipon a Partido ng Demokratikong Pilipino a binangon ni Cagayan de Oro City Mayor Aquilino “Nene” Pimentel Jr. idi 1982, ken ti partido a Lakas ng Bayan a binukel ni Sen. Benigno “Ninoy” Aquino Jr. idi 1978.

Kadua ni Nene Pimentel a nangbangon ti PDP dagiti lider ti politika sadiay Cagayan de Oro City ken Davao City a kimmontra iti diktadora a turay daydi Pres. Ferdinand Marcos.

Uray nakabalud, indauloan ni Ninoy Aquino, kaduana dagiti mabigbig a lider ti oposision ti pannakabukel ti partido a Lakas ng Bayan idi 1978 sakbay ti eleksion ti Interim Batasang Pambansa. Binoykot ti Liberal Party dayta nga eleksion gapu ti pammati dagiti lider ti partido a pabuya laeng dayta a panagpipili. Nagkandidato da Ninoy sadiay Metro Manila ngem naabakda amin gapu iti mapapati a pannakamaneobra ti eleksion.

Idi 1986, nagtipon iti maymaysa a partido ti PDP ken LABAN a nangiduron ti kandidatura ni Corazon “Cory” Aquino iti panagsangoda ken ni Pres. Marcos kabayatan ti 1986 Presidential Snap Election. Idi napadisi ni Marcos babaen ti People’s Power Revolution, ken simmukat iti turay ni Cory ket naangay ti eleksion, nagbalin nga administration party ti PDP – LABAN ken ti partido ni Vice Pres. Salvador Laurel a United Nationalist Democratic Organization.

Idi 1988, nagsina iti dua a grupo ti PDP – LABAN: ti Nene Pimentel Wing ken ti Jose Cojuangco Wing. Sakbay ti 1992 election, nakitipon ti Cojuangco Wing iti grupo ni House Speaker Ramon Mitra Jr. ket nabukel ti partido a Laban ng Demokratikong Pilipino.

Ti PDP – LABAN ti sigud a partido ni Jejomar Binay  manipud pay idi mayor iti Makati ken nagbalin a Bise Presidente. Isuna ti sigud a Party Chairman ngem pinanawanna ti partido ket binukelna ti United Nationalist Alliance gapu iti panagririda iti agdama a PDP–LABAN President Sen. Aquilino “Koko” Pimentel III.

Nagriri da Binay ken Pimentel gapu ti pannakailinia iti partido ni Miguel Zubiri iti panagkandidatona a senador idi 2013. Saan a kinayat ni Pimentel ti pannakairaman ni Zubiri gapu ti isyu ti dagdag-bawas idi 2004 a nakaabakanna iti eleksion. Ni Zubiri ti maikadose a senador ket naregreg ni Pimentel. Ngem naglusulos ni Zubiri idi malawaganen ti resulta iti botos.

Iti kalkalpas nga eleksion, manamnaman ti panagsubli ni Zubiri iti Senado. Maysa isuna kadagiti guest candidate ti PDP – LABAN.         Kasta a talaga ti sistema ti politika iti Pilipinas. Awan ti permanente a kadua ken kakontra. Permanente laeng nga interes dagiti politiko ti adda.#

Comments are closed.