Footer

2 drayber, naatalan, natay

SANTA, Ilocos Sur – Dua a motorista ti natay gapu iti pannakaatalda iti nagsina nga aksidente ti lugan iti national highway sadiay Sto. Domingo ken ditoy nga ili idi aldaw ti Hunio 9.

Iti report manipud iti police stations ti Sto. Domingo ken Cabugao, agpada a naatalan a puon ti ipapatayda kalpasan a nainbolbar ti luganda iti aksidente da Jimar Atayan y Tolentino, 20, baro, delivery boy ti mineral water, ken residente iti Barangay Pagsanaan, Magsingal, Ilocos Sur; ken ni Jolito Pichay y Tabil, 52, naasawaan, ken residente iti Barangay Baclig, Cabugao, Ilocos Sur.

Kas maibatay iti report ti polis, idi agarup 7:40 ti bigat, agdaldaliasat nga agpaabagatan ti Honda XRM motorcycle a minaneho ni Atayan, kasakayna ni Jaymar Arellano y Lagado, 25, baro, ket obertekanna koma ti sarsarunuenna a sabali a motorsiklo ngem nagpreno ta simmungad ti Florida Bus a minaneho ni Herbert Verdadero y Padirayon, 43, naasawaan, ken residente iti Barangay Cali, Dingras, Ilocos Norte.

Gapu iti daytoy, naikras da Atayan iti bangir a linia ti kalsada a nakaatalan ti bus iti ulona ken nagsagrapan met ti inluganna a ni Arellano kadagiti sugat.

Naitaray dagiti dua iti Magsingal District Hospital ngem naideklara ni Atayan nga awanen ti biagna.

Boluntario a simmuko ti drayber ti bus iti Magsingal police station sa naikustodia iti police station ti Sto. Domingo para iti dokumentasion ken umisu a disposision.

Iti pannakaisurat daytoy, naisubmiten ti rekord ti kaso iti opisina ti provincial prosecutor, Vigan City, Ilocos Sur para iti inquest proceeding maikontra ken ni Verdadero.

Kabayatanna, idi agarup 10:40 ti bigat ti daytoy met laeng a petsa, agpaabagatan a direksion ti Honda TMX tricycle a  minaneho ni Pichay, pasaherona da Cynthia Pichay y Antolin, 52, naasawaan; Jay-Pee Pichay y Ulagani, 18, baro; ken Ian Keith Yañez y Pichay, 2, agnaedda amin iti Barangay Baclig, Cabugao idi mapasamak ti aksidente.

Mapapati a pinadas nga  obertekan ni Pichay ti maysa a lugan iti sanguananna idi inobertekan ti sumarsaruno a Mitsubishi Adventure ti traysikel ket nasapgidna ti bakrang ti lugan a puon ti nakaikrasanna iti dayaen nga abaga ti kalsada ken nakaipalladawan ni Pichay iti tengnga a linia a nakagapu iti pannakaatal ti ulona.

Dagus a natay ni Pichay idinto a nagsagrap kadagiti sugat dagiti pasaherona ket naitarayda iti Ilocos District Hospital iti Narvacan, Ilocos Sur para iti pannakaagasda.

Nangiwayat dagiti polis iti pursuit operation ngem saanda a nasapulan ti Mitsubishi Adventure.

Agtultuloy ti panagimbestiga dagiti polis para iti pannakatunton ti nagmaneho iti lugan a nanglibas kadagiti biktima.#