Footer

BANNER: Pagpigsaan ti panagsanto ni Bishop Versoza ti kinatallugodna: Msgr. Formoso

BANTAY, Ilocos Sur –  Kinuna ti maysa nga opisial ti Simbaan ditoy a saan nga agpeggad ti panagbalin a santo ni Bishop Alfredo Versoza gapu iti maikontra a pangngeddeng ti Vatican mainaig iti Marian apparitions a napasamak iti Lipa, Batangas idi Agosto 1948.

Kinuna ni Msgr. Gary Formoso, vice postulator ti beatification ni Bishop Versoza, a ti kinatallugod ti taga-Vigan nga obispo iti Vatican ti pagpigsaan ti kaso ti panagbalinna a santo.

Kinuna ni Formoso nga idi indeklara ti Simbaan a saan a pudno ti aparision ni Santa Maria ken ti panagtudo dagiti petalo ti rosas, nupay personal a napadasan ni Bishop Versoza ti aparision, kas natallugod a pasurot ti Simbaan, sinurotna ti pammilin ti Vatican.

“Ingget tallugod ni Bishop Versoza iti Roma, ket nupay agrisrisiris iti kaungganna a pudpudno daydiay a milagro agsipud ta mismo a nasaksianna, nagulimek laengen agsipud ta dayta ti imbilin ti Roma. Kasta ti katallugod ni Bishop Versoza, isu a pagpigsaan ti kasona ti kinatallugodna,” kinuna ni Formoso.

Kinuna pay ni Formoso a ti personal a galad, gapuanan ken pannursuro ni Bishop Versoza dagiti material a maar-aramat tapno maiduron ti panagbalinna a santo.

Maipalagip nga idi 2015, imbilin ti Vatican ti panagbalin ni Bishop Versoza nga Adipen ti Dios. Daytoy ti umuna a titulo a maited kadagiti kualipikado nga agbalin a santo.

Ni Bishop Versoza ti obispo ti Lipa idi napasamak ti panagparang ni Birhen Maria idi 1948 ket nupay di namati idi damo iti aparision, mapapati a nasaksianna ti panagtudo dagiti petalo ti rosas isu nga impalubosna ti benerasion ken ni Birhen Maria.

Maysa met ni Bishop Alfredo Obviar, auxiliary bishop ti Lipa idi obispo ni Versoza, ti mapapati a nakapadas pay iti panagtudo dagiti petalo ti rosas ket kas ken ni Versoza maipagpagna met ti panagbalinna a santo.

Mapapati nga immuna a nagparang ti “napintas a babai a nakaaruat iti puraw” ken ni Teresita Castillo idi Agosto 1948. Kandidato idi ni Castillo nga agpaay iti monasterio ti Lipa, Batangas.

Idi Septiembre 13, nagparang ken ni Castillo ti napintas a babai a nagakkub dagiti imana bayat nga agkarkararag ken nakaiggem iti rosario iti makannawan nga imana. Iti kabigatanna, nagtudo dagiti petalo ti rosas iti monasterio.

Mapapati a naimaldit kadagiti petalo ti imahe ni Birhen Maria ken ni Jesus.

Idi agangay, nabigbig ti aparision a kas Our Lady, Mediatrix of all Graces.

Ngem iti inbestigasion nga insayangkat ti innem nga obispo idi 1951, naideklara a saan a pudno ti aparision ken peke ti panagtudo ti petalo ti rosas.

Kas maibatay met iti resulta ti naisayangkat a lokal nga inbestigasion,  indeklara ni Lipa Archbishop Ramon Arguelles nga addaan ti Marian apparitions iti “supernatural a kagagalad ken maiparbeng iti narelihiosan a pammati”.

Ngem itay Mayo daytoy a tawen, indeklara ti Vatican ti saanna a panangaklon iti otentisidad ti Lipa apparitions. Imbilin met ti Congregation of the Doctrine of Faith a dagus a mawara aminen a komision a mangad-adal iti kuestion ti mapapati a supernatural a pagteng ti aparision iti Lipa. (TMN Team)

Comments are closed.