Footer

EDITORIAL: Panaglukat ti School Year 2016 – 2017

MANGRUGI ita nga aldaw ti panaglukat ti klase dagiti nagduduma a pagadalan iti sapasap a Pilipinas para ti School Year 2016 – 2017.

Napateg unay ti edukasion kadagiti Pilipino, ken ibilang dagiti kaaduan a nagannak a daytoy ti kapatgan a gameng a saan a pulos a mapukaw a maisagut wenno maipatawidda kadagiti annakda. Daytoy ti gapu a dagiti nagannak nga adda mabalinna ket ibaonda dagiti annakda kadagiti pribado ken nangato ti standard-na a pagadalan. Dagiti marigrigat a nagannak ket ikagumaanda a pagbasaen dagiti annakda kadagiti pang-publiko a pagadalan.

Iti iseserrek ken panagsubli dagiti estudiante kadagiti pagadalan, nakasagana kadin ti Department of Education ken Commission on Higher Education, ken dagiti pribado nga institusion iti edukasion a mangipaay ti tumutop a serbisio? Nakasagana kadin dagiti estudiante, nagannak wenno dagiti mangay-aywan kadakuada?

Kadagiti naglabas a panaglukat ti klase, adu latta dagiti parikut a napaspasamak kadagiti nagduduma nga eskuelaan nangruna kadagiti public schools sadiay Metro Manila ken dagiti dadakkel a siudad kas ti kaadu ti bilang dagiti estudiante ket saan nga umanay dagiti classroom wenno siled dagiti pagadalan. Adu a lugar iti pagilian a dagiti estudiante ket aglilinnetlet kadagiti classroom, ken agkaklase kadagiti sirok dagiti kayo, covered court wenno tolda ken dadduma pay a paglinongan.  Gapu iti kaadu dagiti bilang dagiti estudiante kadagiti public school ket mapilitan dagiti mangimatmaton kadagiti pagadalan a pagbalinenda a dua wenno tallo a shift iti maysa nga aldaw ti schedule dagiti estudiante. Ngem maapektaran daytoy ti kalidad ti serbisio dagiti mangisursuro ken panagadal dagiti ubbing. Kadagiti estudiante kadagiti pang-publiko a pagadalan ti elementary  kadagiti dadakkel a siudad, kadawyanen a dagiti ubbing ket parbangon pay laeng no mangrugi ti klaseda para iti umuna a shift. Dumanon met iti alas-nuebe iti rabii dagiti estudiante iti maikatlo a shift. Adu pay dagiti parikut kadagiti pang-publiko a pagadalan malaksid ti kurang a pasilidad, kas ti kinakurang dagiti mangisursuro ken dagiti mausar a libro ken dadduma pay nga alikamen. Iti probinsia, adda dagiti public elementary school a dagiti mangisusuro ket dua wenno ad-adu pay a grado ti isuroda nga aggigiddan.

Iti laksid dagitoy a nabayagen a saan pay a nasolbar a problema ket intuyang ti administrasion ni Presidente Benigno Aquino III ti pannakaadaptar ti Kindergaten + 12 Program tapno mapadur-as ti kalidad ti edukasion iti pagilian. Nasken daytoy  tapno dagiti agturpos iti kolehio ket mayataday iti international standard ti edukasion, ken tapno dagiti agreduar iti Senior High School ket maipakatda dagiti naadalda a track iti panagbirokda iti trabaho.

Napintas ti panggep ti K + 12 ngem nakasagana kadin dagiti pagadalan ken dagiti nagannak a mangpabasa kadagiti annakda? Saan pay a nasolbar dagiti adu a parikut kadagiti eskuelaan ken ti rigat dagiti nagannak a mangpaadal kadagiti annakda, ngem adtoy manen ti sabali a parikut. Iti pannakairugi ita ti Grade 11 ti Senior High School kas mayataday iti K to 12 Program ti DepEd, adu dagiti manamnama a tumaud a problema kas ti saan pay a naan-anay a nakasagana dagiti adu nga eskuelaan a mangawat kadagiti sumrek iti Senior High School.

Sakbay ti panaglukat ti klase, impalgak ti DepEd a nababbaba nga amang ti bilang dagiti nagenrol iti Grade 11 ngem dagiti manamnama nga agtuloy koma iti Senior High School ta dakkel ti babbabaanna ti bilang dagiti nagturpos iti Grade 10 itay napalabas a panagserra ti School Year 2015 – 2016. Daytoy ket iyanninawna nga adu dagiti nakaileppas ti Junior High School itay kalgaw ti saanen a makapagtuloy iti panagbasada.

Inrakuraken ni outgoing DepEd Secretary Armin Luistro ti panangpatalged ni incoming Secretary Leonor Briones ti panangituloy ti administrasion ni President-elect Rodrigo Duterte ti K + 12 Program. Ngem awan pay ti mangmangeg a napigsa ken nalawag a policy ti sumaruno nga administrasion mainaig iti edukasion. Sapay koma ta ibingayanto met ti Duterte administration ti prioridad ti edukasion, mainayon iti kampania ti pannakapasardeng dagiti krimen ken kurapsion. (Eden A. Alviar)

Comments are closed.