Footer

Ryan rice, naiwaras kadagiti mannalon

CABUGAO, llocos Sur – Naibunong manen kadagiti mannalon ditoy nga ili ti Ryan Rice itay Hunio 10 tapno ad-adda pay a mapadakkelda ti produksionda a bagas.

Mismo nga inwaras ti DA-LGU nga idadauluan ni Acting Municipal Agriculturist Robert S. Savella ken ti pannakabagi ti ken ni Lolita Arce, pannakabagi ti OPAG-Ilocos Sur, ti Hybrid Rice 182 wenno Ryan Rice kadagiti rehistrado a mannalon ditoy nga ili.

Kanaig daytoy, impeksa ni Mayor Edgardo S. Cobangbang, Jr. ti panagyamanna iti liderato ti gobierno probinsial gapu iti agtultuloy a panangipapaayda iti tulong kadagiti mannalon tapno mapadur-as ti panagbiagda.

Indagadag ni Cobangbang ti panangsurot dagiti mannalon kadagiti pagannurotan iti panagtalon tapno maragpatda ti dakdakkel a produksion ti bagas.

Kabayatanna, kas  kulminasion ti panangrambak iti Maika-118th nga anibersario iti panagwaywayas ti Pilipinas, nangangay ti lokal a gobierno ditoy iti panagmula iti mangrove ken panagdalus iti igid ti baybay idi malem ti Hunio 10.

Lima a coastal barangays a pakaibilangan ti Pug-os, Salapasap, Sabang, Salomague ken Dardarat ti napan nag-mulaan iti mangrove ken nagdalusan ti lokal a gobierno ditoy a pakaibilangan dagiti agpapaay iti nadumaduma a departamento ken pagopisinaan ditoy nga ili.

Naibatay daytoy nga aktibidad iti Office Order No. 06, Series 2016 iti Opisina ti Mayor a napetsaan iti Hunio 9, 2016. (TNM team)

Comments are closed.