Footer

Ti Palimed ni Erning

Sarita ni Arnold A. Reyes

(Umuna a Paset)

 

IDALDALIMANEK ni Erning dagiti papeles iti lamisaanna idi asitgan da Tony, Ben ken Mario.

“Kasangayko, pari,” kinuna ni Tony, “Intayo aghapihapi ‘diay Redland. Umaykan tapno makompleto ti barkada.”

“Sige, umayak,” inyanamong ni Erning. Pagustuanna man la idan tapno saandan a kanayon a kuliten. Nabayagen dagiti kaopisinaanna a mangkulkulit kenkuana a sumurot iti panaghapihapida iti beerhouse.

Nakaar-ariwawada iti lugan. Nagpipinnasindayag da Tony, Ben ken Mario iti padasda iti babai. Namrayan ni Erning ti nagdengngeg. Sinutil la ket ngarud dagiti kaopisinaanna idi imbagana a damona ti umadak iti beerhouse.

“Dikanto agbabawi a sim-murot, pari,” kinuna ni Tony. “Ubbing ken nalalapsat dagiti chicks iti Redland. Ken palabanda.”

“Baka malipatan ni Pari Erning ni Solima no maaprosanna ni Lulu,” insarurong ni Ben.

Nagdalapdapen ti sipnget idi sumrekda iti pagiinuman. Inokuparda ti lamisaan nga adda iti  suli. Nagbilin ni Tony iti sangadosena a serbesa ken pulotan.

“Dikayo agpamayan, kakadua,” kinuna ni Tony. “Napuskol ti petakatayo. Uray no pinnatnagan, kunayo, sapsapadatayo. Sinaganaak daytoy a panagkasangayko.”

“Dayta man ti magustuak,” kinuna ni Ben idinto a binukbokanna iti serbesa ti basona. Kasla mawaw la unay a nangarub-ob iti serbesa.  Awanen ti naggian ti basona idi idissona iti lamisaan.

“O, agpulotanka, pari,” indungso ni Mario ti kilawen iti sanguanan ni Erning. “Dika agkapuykapuy no kastoy nga asideg ti langit kadatayo.”

“Baka pampanunoten ni Pari Erning ti pang-or a sumabat kenkuana no agawid,” inkantiaw ni Ben.

“Saanak a USA, pari,” nakuna ni Erning. “Uray pinnatnagan, okeyak.”

“Dayta, a, ti lalaki,” impikpik ni Mario. “Paragsakentayo ti kasangay ni Pari Tony.”

Kalpasan ti saggapatda a botelia ti serbesa, naarimbangawdan a kasla tukak a damona ti maarbisan.

Mangrugin a pumuskol ti rupa ni Erning. Nupay kasta, kabaelanna pay ti uray uppat pay a botelia.

Sinitsitan ni Tony ti serbidor. Adda inyarasaasna. Nagtung-ed ti serbidor.

Madamdama, immasideg ti uppat a babbai. Inyam-ammo ni Tony da Frances, Maria, Grace ken Lulu. Napigket ti panangmatmat ni Erning ken ni Frances. Napudaw. Nabaknang ti barukongna. gimmitara ti pammagina. Agtawen ngata iti sangapulo ket walo.

“Frances, buniagam man ni Pari Erning,” inkidday ni Tony.

“Ekspertoak iti dayta,” inkatawa ni Frances. Nagtugaw iti abay ni Erning. Nagdennes dagiti luppoda.

Naipatayab ti garampang a tokar. Timmakder da Mario, Tony ken Ben ken dagiti kaasmangda. Kasta unay ti pamsaakanda nga agkuyegyeg ken agkayangkayang.

“Inta met agsala,” inyawis ni Frances.

“Sweet music laeng ti ammok,” nakudkod  ni Erning ti di met aggagatel a teltelna.

Sineniasan ni Frances ti serbidor ket inarasaasanna. Nalamuyot a tokar ti simmaruno a naipatayab.

“O, paboritom,” kinuna ni Frances. “Sumublatta met nga agsala.”

“Napintaska, Frances,” inyarasaas ni Erning idi agsalsaladan.

“Nalaingka met gayam a bumola,” inkatawa ni Frances.  “Manon a babai ti nangibagaam iti dayta?”

“Sika pay laeng.”

Nagkatawa manen ni Frances. Ngem nagpabus-oy idi awiden ni Erning. Narikna ni Erning ti nabaknang a barukong ti balasang a naidennes iti barukongna.  Kinidemanna ti imnas a mangitaytayok kenkuana.

Nalpas ti sonata. Nagtugawda. Tinuyagan ni Erning ti basona sana inareb-eb. Nalabbasiten. Timmured. Sangkaaprosna ti luppo ni Frances.

“Pari, kursonadak ni Frances,” inkissiimna ken ni Tony.

“Areglado, pari,” insungbat ni Tony. “Siak ti makaammo. Kukuam ita nga agpatnag ni Frances.”

(Adda tuloyna)

Comments are closed.