Footer

Trabahador, masuspetsa a pinaltoganna ti bagina

NARVACAN, Ilocos Sur – Foul play wenno insidente ti suicide? Daytoy ti anggulo a kitkitaen dagiti inbestigador mainaig iti  pammaltog a napasamak iti Barangay Pantoc ditoy nga ili idi sardam ti Hunio 4.

Nagsagrap ni Joel Cabebe y Tabalanza, 19, awanan asawa, laborer ken residente iti Barangay Pantoc iti gunshot wound iti makannigid a paset ti mugingna ket immuna a naitaray para iti pannakaagasna iti Ilocos Sur District Hospital ditoy nga ili sa naiyalis iti Regional Hospital, San Fernando City, La Union .

Maysa a pistol nga addaan marka a Pic De Catur GA Cal. 25, Made in Germany nga addaan serial number 69532 a nagkarga iti maysa a bala ken adda nakasulbong nga awan naggianna a magasin ti insuko ti maysa a Harold Fiesta y Cantil, 32, naasawaan, negosiante, ken kaarruba ni Cabebe, kadagiti nagresponde a polis.

Segun iti inisial a panagimbestiga dagiti polis, napanawan nga agmaymaysa ni Cabebe iti balay dagiti agassawa nga Armando ken Marlyn Catolico ta napan gimmatang iti yelo dagiti kakaduana a pakaibilangan da  Kevin Cabusas y Arafiles, 15; Rowelito Villanueva y Peralta, 16; Nathaniel Abulog y Molina, 15; Jerick Cantil y Artatez, 15; ken  Patrick Cahigas y Castro, 18, residenteda amin iti nadakamat a lugar.

Idi nagsubli ti grupo, mapapati a nadatnganda laengen ti biktima a naidasay ken daradara ket nagpaarayatda ken ni Fiesta sada intaray ti biktima iti ospital.

Segun iti inpormasion a nasagap dagiti inbestigador, addan insidente a pinanggep ti biktima a kettelen ti biagna iti napalabas.

Nakiddaw iti SOCO team manipud iti Ilocos Sur Crime Lab Office ti panagiwayatda iti panagamiris iti crime scene.

Kabayatanna, mapapati nga ayat ti ramut ti panangkettel ti maysa baro iti biagna sadiay Barangay Calongbuyan, Candon City idi rabii ti Hunio 4.

Naduktalan laengen ni Rowena Alviento y Quines, 17, a natayen ti kabsatna a ni Regie Alviento y Quines, 18, baro, idi napan naglukat iti balayda iti agsapa ti Hunio 5.

Maysa a nylon a tali nga agatiddog iti dua a metro ti narekobre iti nakatayan ni Alviento.

Awan ti nakita dagiti polis a foul play iti nagbekkelan ti biktima.

Kinuna ni Rebecca, ina ti biktima, a mapapati nga addan saan a panagkinnaawatan ti anakna ken ti patpatgenna a babai ket imballaag ti anakna a kettelenna ti biagna.

Saan nga impalubos ti pamilia ti biktima a maautopsia  ti bangkayna.#