Footer

3 balay, naireport a natakawan

BANTAY, Ilocos Sur – Tallo a pagtaengan ti naireport a natakawan idi Hunio 16 a nakakurimesan dagiti napapateg a sanikua ken kuarta.

Immuna a naireport a natakawan ti balay ni Delia Pangan y Apanapao, 55, naasawaan, ken residente iti Barangay Bayubay Sur, San Vicente, Ilocos Sur idi agarup 2:25 ti agsapa ti Hunio 16, partikular ti up-upaan a kuarto ni Rodelin Peralta y Farinas, 30, awanan asawa, manedier iti Jolibee, Vigan City Branch.

Segun iti palawag ni Peralta, imparabawna ti shoulder bagna iti bassit a lamisaan iti abay ti tawa ti kuartona a nakaikabilan ti petakana a naggianan ti kuartana a P5,500.00; 10 a Euro ken  13 a US dollar  .

Nakariing ti biktima iti karasakas ket nakitana laengen ti di nabigbig a suspek a nangala iti bagna sa naglibas a simpok iti nasamek a paset ti likud ti balay.

Kinuna ti biktima a naliwayanna nga inserra ti sliding window ti kuartona.

Iti sabali a damag, inreport ni Rodrigo Dayoan y Cabacungan, 85, naasawaan, retirado a soldado, ken residente iti Barangay Ballaigui, Sinait, Ilocos Sur a natakawan iti alahas ti kabsatna a ni Filomena Dayoan y Cabacungan, 94, awanan asawa, dentista, agnaed met laeng iti nadakamat a barangay ket suspek da Jezzel Tubera y Bagasin, 18, awanan  asawa, ken Jona Mae Cajuday y Daguro, 21, awanan asawa, agpada a residente iti Barangay Pagsanahan-B, Badoc, Ilocos Norte.

Kas maibatay iti report dagiti inbestigador, idi agarup 7:00 ti sardam ti Hunio 14, simrek da  Tubera ken Cajuday iti balay ni Dayoan tapno alaenda ti nabatida a saba iti dirty kitchen bayat a mangrabrabii ti biktima.

Idi simrek ni Dayoan iti kuartona, naduktalanna laengen nga awanen ti singsingna a namuntaran kadagiti diamante nga agbalor iti P25,000.00; paris nga aritos  nga agbalor iti P100,000.00; 2 bracelet nga aggatad iti P25,000.00 ken maysa a kuentas nga addaan iti pendant nga aggatad iti P100,000.00.

Dati a katulong ni Misis Dayoan dagiti suspek ngem nagikkatda ken pimmanawda idi Hunio 12, 2016.

Kabayatanna, naireport pay na idi agarup 7:30 ti sardam ti daytoy a petsa a natakawan ti family house da Rose Marie Agas y Luna, 69, a masarakan sadiay Barangay Quirino, Tagudin, Ilocos Sur.

Kas maibatay iti panagimbestiga dagiti nagresponde a polis, idi agarup 5:00 pm iti dayta met la a petsa, napan ni Agas iti balayda ket nakitana a nakalukat ti ruangan isu nga intawagna ti insidente iti anakna a ni John  Ian Agas y Luna, 22, awanan asawa, ken agtrabtrabaho iti abroad.

Segun ken ni Agas, iti napalabas a sumagmamano a sardam, tumanaul dagiti asoda  ken dagiti aso dagiti kaarrubada.

Dagus a kinontak ti OFW dagiti kaarrubada ken gagayyemna nga agsawar iti aglawlaw ti balayda.

Narekobre iti ubong ti baboy iti likud ti balay ti naabandonar a laptop bag a kukua ni Agas a naggianan ti head phone ken CDs.

Awan a mabirokan ti laptop ni Agas a naikabil iti babaen ti kabinet iti kuarto ti inana.

Agtultuloy ti panagimbestiga dagiti polis iti nasao a panagtakaw a mapapati a naisayangkat a nasapsapa ngem iti aldaw a pannakaireportna. (Tawid  News Team)

 

Comments are closed.