Footer

Drayber, kinasakayna, natay iti aksidente

SAN JUAN, Ilocos Sur – Dua ti natay idinto a nasugatan ti maysa gapu iti panangdungpar ti motorsikloda ti maysa a dakkel a bato iti igid ti kalsada sadiay Barangay Dardarat, ditoy nga ili idi rabii ti Hunio 14.
Naideklara nga awanen ti biagda idi maidanonda iti Pira Hospital, Cabugao, Ilocos Sur gapu iti sinagrapda a dundunor iti nasao nga aksidente ti nagmaneho iti motorsiklo a ni Genaro Tapuro, Jr., y Reboron, 32, balo, ken residente iti Barangay Sta. Cruz, Sto. Domingo, Ilocos Sur; ken ti kinasakayna a ni Leonardo Palor, 34, mekaniko.
Nagsagrap met ti sabali pay a kinalubbon dagiti dua iti motorsiklo a ni Jose Ulibas, residente met laeng iti Barangay Sta. Cruz, Sto. Domingo ket naipaagas met iti nadakamat nga ospital.
Iti panagimbestiga dagiti polis, bayat ti panagdaliasat iti nagpikuran ti TMX 155 motorcycle a nagluganan dagiti tallo, napukaw ni Tapuro ti kontrolna iti manibela a puon ti panangdungpar ti luganda iti bato iti igid ti kalsada.
Mapapati a napardas ti panagtaray ti motorsiklo a minaneho ni Tapuro.#