Footer

Ti Palimed ni Erning

Sarita ni Arnold A. Reyes

(Maikadua a Paset)

 

 

Alas tresen iti parbangon idi agawidda. Nagpipinnasindayagda iti nagapuanan.

“Talaga a palaban ni Lulu,” insanamtek ni Ben.

“Nakarkaro pay ni Grace, a,” insalingbat ni Mario. “Kasla alimatek!”

“Sika, pari, napnekka met laeng?” sinikil ni Tony ni Erning.

“Da bes, pari,” insungbatna. “Sal-at a babai, batido a talaga!”

“No aniat’ kunayo, intayonto manen,” kinuna ni Tony.

“La ketdi, a,” nakuna ni Erning.

“Nabatin sa metten ti karkarmam ken ni Frances, pari,” intapik ni Mario. Nagkakatawada.

Dimsaag ni Erning iti nagkurusan. Aglallallay a simrek iti inaladanda. Sigagangat pay laeng ti silaw iti salas. Linuktanna ti ruangan. Matmaturog ni Solima iti sopa. Riniingna ni baketna.

“Apay a ditoy ti nagturogam?” inamadna.

“Inur-urayka ngamin,” insungbat ni Solima. “Nagladawkan?”

“Kasangay ni Pari Tony,” kinuna ni Erning. “Nagblow-out.”

“Isu met la nga agat-sigarilioka,” kinuna ni Solima. “Inka man suktan ti pagan-anaymo sakbay a sumrekka iti siledta.”

Nagkatawa ni Erning. Agsigsigarilio idi ni Erning ngem inidianna idi armenna ni Solima. Natadem ti panagangot ni baketna. Numero uno a kagurana ti asuk ti sigarilio.

Kalpasan ti panaglabarna, simrek iti siledda nga agassawa. Nakaiddan ni Solima. Napatilmon ni Erning idi mataldiapanna ti nalukaisan a napudaw ken limmapana a luppo ni baketna.

Dimmenden ni Solima ket inap-aprosanna ti barukong ni Erning. Narikna ni Erning ti nabara a sang-aw ni baketna.

“’Ling, adda napintas nga ipadamagko kenka,” kinuna ni Solima. “Addan agpitpitik iti saklotko.”

“Agbalinak gayamen nga ama!” nayesngaw ni Erning. Inarakupna ni Solima ket dinigosna iti agek. Idi malang-abna ti nabanglo nga ayamuom ti buok ni baketna, natukay ti kinalalakina. Nagkaradap ti dakulapna iti nalamuyot a munturod.

“Hu, sabali manen ti malagipmo,” agkatkatawa a ni Solima a nangakkal iti imana. “Saan a mabalin ta agat-serbesaka.   Ken maysa, dandanin bumigat ket masapaka a mapan agopisina.”

MINATMATAN ni Erning ti bagina iti sarming. Umad-adu dagiti nalabbasit iti barukong ken takiagna. Inapirasna ti maysa. Nagatel. Adda pay madmadlawna no umisbo. Kasla sirsiripiten. Sumagmamanon nga aldaw a madmadlawna a narigat ti yiisbona.

Ngem kinutina ti abagana idi agangay.. Adda siguro naipaunegko a maikontra iti bagik, naisipna. Nagpelles.

Saanen a nammigat ta maladawen. Nagkape laengen.

“Masapaka nga aggawid, wen?” kinuna ni Solima. “Mapanta idiay yan da Daddy. Kasangayna. No awanka, sigurado a bad shotka kenkuana!”

“Mabalin kadi a malipatak ti kasangay ti nangputot iti kapintasan a babai iti biagko?” kinuna ni Erning.

Sakbay a pimmanaw, inagkanna ti baketna.

Idi sumangpet iti opisinada, nadarimusmosanna ti paggaak dagiti kaopisinaanna. Ammona lattan a ti padasda iti babbai ti sentro ti patanganda.

“Naladawka man, lakay,” inkidday ni Tony. “Immulika kadi iti bantay itay parbangon?”

“He, ti la mataltalanggutangmo,” kinuna ni Erning. “Innem a bulanen ni baket.”

“Narigat ti mabakante, brod,” kinuna ni Tony. “Masapul nga adda sabali a pangipugsitam. No ania ti kunam, agpallailangtayo iti langit kalpasan ti opisina.”

“Kasangay ti katugangak, saan a mabalin a diak kuyogen ni baketko a mapan mangrabii iti balayda,” kinuna ni Erning.

Timmakder  ni Erning sa nagturong iti pagisbuan. Nabayag iti uneg. Marigatan manen nga umisbo.

Simmeksek iti isipna dagiti nagatel iti bagina. No ngata agpakita iti doktor? Amangan no adda allergyna.

Saan a makatalna ni Erning iti nagmalem. Saanna a maiwaksi iti panunotna dagiti nagatel iti bagina. Wenno adda sakit ni Frances ket naakaran? Nagkintayeg.

“Apay a nabessagka, pari?” indillaw ni Tony idi dandanin ti panagawid.

“M-madmadi ti riknak, pari,” impambar ni Erning.

“Wenno kayatmo laeng ti makaeskor, pari,” kinuna ni Andy.

“Dakayo ketdi, awan san ti naggian iti utekyo no saan a babai,” kinuna ni Erning.

“Isuda dagiti sabong iti minuyongan a pagpallailangan dagiti kulibangbang, pari,” kinuna ni Bert.

Ngem saan a naggawid a dagus ni Erning. Nagtarus iti klinika ni Dr. Santos.

Pinaguksob ni Dr. Santos. Nabayag nga inamirisna dagiti naipattopattok a nalabbasit iti takiag ken barukongna. Nagwingiwing ti doktor.

“Naakaranka iti kastakasta a babai!” kinuna ti doktor.

Saan a nakatimek ni Erning. Nalagipna ni Frances. Ti sal-at, adda gayam korientena!

“Naimbag ta sinigudmo,” kinuna ni Dr. Santos. “Suna laeng ta mabayag nga agpaagaska. Inaldaw a mainyeksionanka iti lima nga aldaw. Agtomarka pay iti tableta.”

(Adda tuloyna)