Footer

Alilem, Ilocos Sur; San Gabriel, La Union, immawat Red Orchid Hall of Fame Award

SAN FERNANDO CITY – Dua nga ili iti Region 1 ti immawat iti pammadayaw itay nabiit kas paset ti panangselebrar ti Department of Health (DOH) iti Maika-118 nga anibersariona.

Mismo a da Presidente Benigno Aquino, agdama a Secretary of Health Janette P. Garin ken incoming Health Secretary Paulyn Jean Ubial ti nangiyawat ken ni Alilem Mayor Mar Ruel Sumabat ken da San Gabriel outgoing Mayor Divina Velasco ken ni incoming Mayor Herminigildo Velasco ti tropeo ken insentibo a P500,000 nga aramatenda para iti ad-adu pay a pannakapondo dagiti programada a panangkontrol iti tabako.

Segun ken ni DOH-1 Health Education and Promotion Officer David Zaragoza, naited ti pammadayaw iti Alilem ken San Gabriel gapu iti panangiyimplementar ti lokal a gobiernoda ti smoke-free environment iti tallo a tawen a nagsasaganad manipud 2013 agingga iti 2015.

Innayon ni Zaragoza a nairusat ti Red Orchid Awards kas panagbirok iti 100% nga smoke-free nga LGUs, opisina ken ospital nga addaan initiatibo a mangprotehir kadagiti umili, nangnangruna dagiti menor manipud iti peggad ti salun-at nga agtaud iti panagsigarilio.

Naited ti pammadayaw iti Alilem gapu iti agsasaganad a panangipakatna kadagiti pagwadan a gannuat tapno mamentener a tobacco-free ti LGU kas iti estrikto nga implementasion ti ordinansa a mangdusa kadagiti agsigarilio iti lugar a publiko, pannakabuangay ti smoke-free task force ken panangipaay dagiti impormasion babaen iti social media kas iti Facebook tapno ad-adda pay a dumanon kadagiti agtutubo.

Iti met biang ti San Gabriel, naipakat ti total ban iti panagsigarilio iti amin a lugar a publiko, pannakaipasdek dagiti pakdaar kontra panagsigarilio ken picture-based health warning posters, pannakaited dagiti pagbasaan iti Ilokano  kontra-panagsigarilio kadagiti amin a rural health unit ken iti pannakaipasdek iti Smoke Free-Task Force.

Maipapaay ti DOH Red Orchid Awards kas maibatay iti Artikulo 8 ti World Health Organization (WHO) Framework Convention on Tobacco Control a mangirekrekomendar iti pannakaadaptar dagiti gannuat tapno maipaay ti proteksion kadagiti umili manipud iti asuk iti nakubong a pagtrabahuan, sasakayan a publiko, indoor places ken dadduma pay a lugar publiko, ken ti  Republic Act 9211 wenno Tobacco Regulation Act of 2003 a mangited iti proteksion manipud iti exposure iti asuk ti tabako. (Manipud iti report ni Joanne Namnama P. Dilim, PIA 1, La Union)