Footer

BANNER: Drayber ti bus, konduktor, natiliw bayat pot session

BANTAY, Ilocos Sur – Iti baet a panaglabsing iti linteg, panagsusop iti droga ti pagpalpaliwaan daytoy a drayber ken ti konduktorna bayat ti panagpalabasda iti oras sakbay ti panagbiaheda.

Ngem malas dagiti suspek ta naitimbreda iti kapolisan ditoy nga ili bayat ti pot sessionda iti mismo nga uneg ti busda a nakaparking iti national highway a sakup ti Zone 5, ditoy nga ili.

Tiniliw dagiti polis da Aldwin Osalvo y Pescador, 44, naasawaan, drayber ti bus ken residente iti Barangay Bulag East, Bantay, Ilocos Sur, ken ti konduktorna a ni Rolly Leones y Tejero, 42, naasawaan, ken residente iti Banaoang, Bantay, Ilocos Sur, bayat ti pot sessionda iti mismo nga uneg ti Benfren Transport Bus a nakaparking iti national highway a sakup ti nadakamat a barangay.

Nakakumpiska dagiti polis iti ikut dagiti suspek iti bassit a transparent plastic sachet a naglaon iti mapapati a  shabu residue;  glass tube tooter a naglaon iti  shabu residue; 3 rolled aluminum foil; 3 napilko a lighter; maysa a dakkel nga awan naggianna a  transparent plastic sachet; maysa nga awan naggianna a  plastic chewing gum box nga addaan shabu residue; 3 plastic straw a naaramat para iti panag-repacking iti shabu, 2 cellular phone (My/Phone), maysa nga eye glasses box ken cash money iti nadumaduma a denominasion nga agdagup amin iti  P17,640.00.

Sinaksian dagiti barangay officials ti Zone 5 ti pannakainbentario dagiti nakumpiska iti ikut dagiti suspek sada naipatulod iti crime laboratory office a nakabase iti Ilocos Sur Police Provincial Office, Bulag, Bantay, Ilocos Sur.

Naipan dagiti suspek iti Gabriela Silang General Hospital para iti medico legal examination sada naipan iti police station ti Bantay para iti ad-adu pay a pannakaimbestiga ken dokumentasion.

Immun-una ngem daytoy, inaresto ti kapolisan ditoy ti maysa a lalaki kalpasan a nasukalan a nagikut iti paltog, droga ken paraphernalia idi  malem ti Hunio 16.

Nagturong dagiti polis iti Barangay Sinabaan, Bantay partikular iti compound ti Felayo’s Junk Shop kalpasan a nakaawatda iti mensahe a maysa a lalaki a nakaaruat iti maong pants ken nangisit a t-shirt ti nagtagipaltog ket naikabil ti armasna iti backpackna.

Dagus a pinaayaban dagiti polis dagiti barangay officials idi adda natangken a banag a naarikapda idi rikisaenda ti bag ti suspek a nainaganan idi agangay a ni Michael Tadeo y Dela Cruz, 32, naasawaan, helper, ken residente iti Barangay IX, Vigan City.

Iti sanguanan da Barangay Kagawad Jimmy Cariño ken Carlo Cariaga, sinukimatda ti linaon ti bag ni Tadeo a nagtungpal iti panangkumpiskada iti Bruni Moc. 82 a paltog, awanan serial number ken addaan magasin nga awanan iti bala; 2 nga improvised glass tooter;  2 a  distorted lighters;  getteng; maysa unit ti  Qnet cellular phone; ken maysa a black pouch a nasukalan iti bulsa ti suspek.

Nakasuan ti suspek iti sumagmamano a kaso a pakaibilangan ti slight illegal detention, carnapping, ken robbery.

Naammuan a karaman ti suspek iti drug watch list ti Vigan City police station.

Ad-adda pay nga imminget ti kampania ti kapolisan ditoy probinsia a mangpugipog iti panagraira iti droga iti sanguanan ti pakdaar ni President-elect Rodrigo Duterte a pugipogenna ti droga iti las-ud iti innem a bulan apaman nga agtugaw iti puestona.#