Footer

Lalaki a nangasulto barangay officials, napilaan kaskaso

VIGAN CITY – Gapu iti panageskandalo,  panagprobokarna ken panangasultona  kadagiti opisial ti barangay a mangpatalna kadakuada nga agkabsat, ken panangitarayna iti paltog ti barangay captain, dakkel a sakit ti ulo ti sanguen ti maysa a maysa a lumugar iti Barangay San Jose, ditoy siudad agsipud ta napilaan iti sumagmamano a kaso a posible a pakaibaludanna.

Kinuna ti kapolisan ditoy a naipaiman iti City Prosecutor’s Office, Vigan City, ti kaso a grave threats, direct assault upon a person and agent in authority, theft ken public scandal maikontra ken ni Jussel Bisquera Paroligan, 26, gapu kadagitoy di maiparbeng nga inaramidna iti barangayda idi sardam ti Hunio 20

Nagramut dagiti kaso iti panangprobokar ni Jerry Bisquera Paroligan, Jr., 26, baro,  ken ni Sherly Paroligan McLean, 55, naasawaan, bakasionista iti nadakamat a petsa  a nakaisawsawan pay ti kabsatna a ni Jussel.

Saan a nailanad iti report no ania ti gapuna a pinobrokar ni Jerry Paroligan ni McLean ken no kaano ti suspek ti bakasionista.

Mapapati a dinadael pay ni Paroligan dagiti jalousy blades ti tawa da McLean.

Napan naganawa da Barangay Chairman Crispin Pisalbo Filarca ken dadduma pay a barangay officials ngem saanda a napagtalna ni Paroligan.

Ad-adda a kimmaro ti situasion idi simngat ni Jussel Bisquera Paroligan, kabsat ni Jerry, ket dinarupna dagiti barangay officials.

Mapapati a ginammatan ni Jussle Paroligan ti bag a nakaikabilan ti  cal. 45 Norinco a paltog  ni Barangay Captain Filarca sana intaray.

Bayat ti panagiwayat dagiti nagresponde a polis iti inbestigasion ken pannakipatangda kadagiti opisial ti barangay, nakitada ti maysa a karbine nga addaan iti serial number 3815331 nga addaan iti magazine assembly a nagkarga iti 16 a bala iti igid ti kalsada.

Iti pannakaisurat daytoy, di ammo no asino ti agtagikua iti nasao a karbin.

Naikustodia ti paltog iti Vigan City police station sakbay a naipaima iti PCLO.

Kasta met a saan pay a nabirokan ti cal. 45 ti barangay captain nga intaray ti suspek.

Kabayatanna, pinagbalin ti maysa a retirado a maestro a firing range ti atep a sim ti maysa a maipatpatakder a balay iti Barangay Silag ditoy nga ili idi rabii ti Hunio 22.

Inreport ni Silag Barangay Captain Onofre Velasco iti polis ti napasamak iti kabigatanna ket innagananna ni Rogelio Dayos y Della, 69, bayog, ken lumugar met laeng iti nadakamat a barangay.

Nakarekobre dagiti nagresponde a polis iti uppat a kapsula manipud iti cal. 45 iti bisinidad ti balay ti biktima a ni  Manuel Ramil y Fontallas, 27, baro, mannalon.

Impresenta ni Dayos kadagiti polis ti paltogna a cal. 45, certificate of license to own and possess firearm for individual ken certificate of firearms registration para indibidual a naaprobaran idi Hunio 15, 2016.

Saan a nailanad iti report no apay a pinalpaltogan ni Dayos ti atep a sim ti balay ni Ramil.

Naiyendorso ti kaso iti opisina ti barangay captain idinto a naikustodia ti paltog iti Sta. Maria police station.#