Footer

Natakaw a motorsiklo, narekobre

STO. DOMINGO, Ilocos Sur – Narekobre dagiti polis ti maysa a motorsiklo a mapapati a natakaw ngem naabandona iti kabakiran a paset ti Barangay Cabigbigaan, ditoy nga ili idi bigat ti Hunio 23.

Dagus a nagresponde dagiti polis kalpasan a nakaawatda iti impormasion nga adda naabandona a motorsiklo  a SYM 100cc Bunos X a motorsiklo, awanan numero ti plaka iti kabakiran a paset ti nadakamat a barangay.

Segun iti report, nalimed a nagsiput dagiti barangay officials  ket namonitorda ti ipapan da Dominic Soliven y Tapuro, 18, ken residente iti Barangay Pangpangdan, ken Anthony Paje y Tabag, 21, ken residente iti Barangay Cabigbigaan iti nadakamat a lugar tapno alaenda ti motorsiklo.

Impaima dagiti barangay officials dagiti dua kadagiti nagresponde a polis.

Maipalagip a natakaw ti nasao a motorsiklo a kukua ni John Bernard Azada,  21, empleado iti Puregold ken residente iti Barangay VI, iti parkingan ti establisimiento a masarakan iti Barangay VIII, Vigan City idi Hunio 21.

Inyawat dagiti polis Sto. Domingo dagiti suspek iti polis ti Vigan City para iti dokumentasion ken umisu a disposision.#

Comments are closed.