Footer

Salesman, napaltogan bayat ti panaganawana

VIGAN CITY – Boluntario a simmuko ti maysa a lalaki a nangpaltog iti kalugaranna sadiay Barangay Pantay Laud idi rabii ti Hunio 19.

Mismo a kinuyog da Barangay Chairwoman Marilyn Remolete ken dagiti kabagianna ni Jon Jon Donato Racaido, 20, awanan asawa, car washer, ken residente iti Barangay Pantay Laud idi simmuko daytoy iti polis kalpasan a pinaltoganna ni Crisanto Rabanal y Mendoza, 19, baro, salesman, ken lumugar met laeng iti nadakamat a barangay.

Naammuan a naipababaen iti operasion ni Crisanto Rabanal iti Gabriela Silang General Hospital, Vigan City ket naipababaen iti operasion.

Kas maibatay iti report, idi agarup 8:30 ti sardam ti Hunio 19, agpapatang da Crisanto ken gagayyemna iti balay ni Julius Rabanal y Rabuya, 21, awanan asawa, idi nagsardeng ti motorsiklo a minaneho ni Donato sa mapapati a pinangremanna dagiti agpapatang. Pimmanaw ti suspek kalpasanna.

Idi agarup 9:10 iti dayta met la a rabii, nagsubli ni Donato ket kinumprontar ni Julius. Mapapati a nagprobokar ni Donato a nagresulta iti panagdinnanogda.

Napagtalna dagiti dua ngem pinaputokan ni Donato ni Julius. Nagmintis ket naglemmeng ni Julius. Pinaltogan manen ni Donato ni Julius ngem nagmintis latta.

Pinagtalna ni Henrich Rabanal ti suspek ngem nagringgorda ketdi. Timmulong ni Crisanto a mangpatalna ken ni Donato ngem isu ketdi ti pinaltogan ti suspek sa naglibas a pimmanaw a nakasakay iti motorsiklona.

Nakarekobre dagiti inbestigador ti homemade caliber 22 nga awanan marka, nga addaan iti naiputok a cartridges ken uppat a bala iti cylinderna.

Naisubmite ti paltog iti Crime Laboratory Office para iti ballistic examination.

Simmuko met laeng ti suspek idi agarup 11:50 iti dayta met laeng a rabii.#