Footer

Ti Palimed ni Erning

Sarita ni Arnold A. Reyes

(Maudi a Paset)

 

Adalemen ti rabii ngem di makaturog ni Erning. Umuk-ukuok iti panunotna ti imballaag ni Dr. Santos: Makaakar ti sakitmo. Dika makinaig ken ni baketmo agingga iti saan a naan-anay a maagasanka.

Impakita pay ti doktor dagiti ladawan dagiti naipasngay nga ubbing nga inakaran ti inada idi masikogda. Adda amin depektoda. No saan a pukol ti saka ken imada, rutongrutongan ti rupada, limmabba ti uloda ken kasla binalitungeg dagiti nadumaduma a paset ti bagida.

Maikatlon a rabii a dina kinaidda ni Solima. Nagpupok iti bassit a bibliotekana. Impambarna nga adu ti report nga ikamakamna.

Isun ti nanglaba kadagiti pagan-anayna. Inyuperna pay iti napudot a danum. Idi agusisa ni Solima, di pay isu a pakaringgoram. Manipud ita,  Baby ti aywanam a naimbag, kinunana.

“Dika pay gayam nakaturog,” nalukag iti panagpampanunotna idi agtimek ni Solima iti likudanna.

“Ikamkamakamko ti reportko,” inyulbodna.

“Adda kadi parikutmo, “Ling?”

“A-adda, ‘ya?”

“Dinak koma paglibakan. Kabisadokan. Ammok nga adda parikutmo. Ibagam bareng makatulongak.”

“Pampanunotek ngarud ti kasasaadmo,” kinunana. “Marigatankan nga agkuditkudit.”

“Kabaelak pay.”

“Nasaysayaat no agawidka pay la idiay probinsia. Nataltalged ti nakemko ta adda ni mamang a mangasikaso kenka.”

“Dayta met ti adda iti panunotko,” nakuna ni Solima. “Ngem kasanokan?”

“Dinak pakadanagan. Nairuamak nga agmaymaysa, remember?” kinuna ni Erning sana pinidil ti timid ni baketna.

“Kaano ngarud ti panagpa-Viganko?”

“Inton bigat. Itulodka idiay Partas. Diay Deluxe ti sumakayam ta nawaywayaka ken nataltalna.”

“O, sige,” kinuna ni Solima.

Dimmawat ni Erning iti bakasionna. Nasdaaw dagiti gagayyemna. Inlatakna ti gapuna.

“Kababain pay kenka, pari,” nakuna ni Tony. “Gapu kaniak, nakaalaka iti an-annayem.”

“Nakem siguro ti Dios tapno adda pagulidanantayo,” insungbatna.

“Ammon ni komadre?”

“Saan pay. Diak maitured nga ibaga. Ngem ti pakadanagak no naiyakarko kenkuana ti sakitko.”

“Nagkanaigkayo kadi ken ni Mari Solima kalpasan daydi panaghapihapitayo? sinaludsod ni Tony.

“Dayta ngarud ti pagamakak ta dua beseskami a nagkanaig,” kinuna ni Erning. “Diak la ketdi mapakawan ti bagik no rummuar nga adda an-anayen ti anakko.”

“Sapay koma ta saan,” kinuna ni Bert. “No siak ti sika,  p’re, minalem a mapanak agitugkel ken agnobena dita Baclaran.”

“Amin la a mailablabitmo,” nakuna ni Lito. “Serioso ti patangan, saanmo nga iballaet ta agitugkel iti kandela ken agnobena. Mamatika kadi met kadagita, huh!”

“Oy, dimo barengbarengen ti panagkararag,” immulagat ni Bert. “Laglagipem diay pagsasao: uray bimmato a puso, paluknengen ti naimpusuan a kararag. Espues, no agkamangka iti Dios, agbingngi ti ridaw para iti pannakastrekmo no mamatika.”

Nakatosan la ket ngarud ni Lito ni Bert. Nupay napaisem ni Erning, nabati iti panunotna ti imbalikas ni Bert. Apay koma a dina padasen? Awan met ti mapukawna.

Kalpasan ti dua a bulan, nakaawat ni Erning iti tawag manipud ken ni Solima. Agpasngayakton, kinuna ti maysa a paset ti surat. Umayka nga umay.

Nadagsen ti barukong ni Erning a nagturong iti klinika ni Dr. Santos. Naeksamen manen ti dara ken isbona.

Kasla limmagto ti pusona idi ibaga ni Dr. Santos a naimbaganen. Ngem napasennaay idi agangay.

“Ni Solima ken ti anakko ti pakaburiborak, dok,” nakunana. “Kasanon no naakarak ida?”

“Agtartarayen ti sakitmo iti dara dagiti patpatgem. Ilatakmo ti pudno ita ta nasapa pay.”

DIMSAAG ni Erning iti traysikel. Nagkuretret ti mugingna idi makitana a nakarikep dagiti tawa ti balayda.

“Napanan da mamang, nana?” inamadna ken ni Baket Iska a kaarrubada.

“Intarayda ni baketmo ‘diay ospital,” insungbat ti baket. “Agpasngayen!”

Pinara ni Erning ti sumungad a traysikel. Saan a makatalna iti tugawna.

Nagimtuod iti information desk. Imbaga ti nars a maoperar ni baketna. Agur-uray ni mamangna iti ruar iti operating room. Madanagan ti langana.

“Dakkel ti ubing ket di kabaelan ti mammaltot,” nakuna ni mamangna. “Nagbulos ti dara ni Solima ‘su nga intaraymin ditoy.”

Nagpagnapagna. Sangkataldiapna ti ruangan ti pagoperaran. Makatektek dagiti darikmat. Napan iti kapilia ti ospital. Nagparintumeng. Iti umuna a gundaway, nagkararag a sipapasnek.

Kasla nabuttuonan ti abagana a rimmuar iti kapilia. Nasabatna ni mamangna iti pasilio.

“Napnapanamon, ‘ya?” kinuna ni mamangna. “Itay pay la a birbirokenka.”

“A-apay, ‘mang?”

“Nagpasngayen ni Solima. Lalaki ti anakmo.”

“A-ania ti langana?”

“Lokottoyen.” Nagkatawa ni mamangna. “Siempre, karuprupam. Naglungpo. Dumerderosas ti kudilna.”

Kasla nagpayak ti saka ni Erning a simmurot ken ni mamangna. Matmaturog dagiti agina. Linukaisanna ti maladaga. Normal ti anakna!”

“Agyamanak, Diosko!” naitanamitimna. #