Footer

Balo, napaltogan, natay

STA. CATALINA, Ilocos Sur – Natay ti maysa a balo kalpasan a pinaltogan ti maysa a lalaki sadiay Purok II, Barangay Tamorong ditoy nga ili idi bigat ti Hunio 29.

Dagus a natay ni Saturnina Raping y Valmoja, 60, balo, gapu iti sinagrapna a sugat iti mugingna ken makannawan a lapayagna.

Iti inisial a panagimbestiga dagiti polis, bayat ti ilalasat ti biktima iti kusina iti iruruarna iti balayna idi kellaat a nagparang ti maysa nga armado a lalaki a nakaaruat iti brown jacket sana pinaputokan iti namindua ti baket.

Naglibas kalpasanna ti suspek a naglugan iti nalabaga a Honda TMX motorcycle nga awanan iti plate number.

Mapapati a cal. 9mm ti naaramat iti pammaltog kas maibasar iti dua a kapsula a narekobre dagiti inbestigador iti nakapasamakan ti krimen.

Nangiwayat ti polis-Sta. Catalina iti hot pursuit operation maikontra iti di nabigbig a suspek ngem didan nasapulan daytoy. Negatibo met ti resulta ti flash alarm nga impatulodda kadagiti kabangibang a police stations para iti pannakatiliw ti suspek.

Iti pannakaisurat daytoy, di pay ammo ti motibo ti pammapatay.#