Footer

BANNER NEWS: 2 masuspetsa a drug personality, nagsaruno a napaltogan

STO. DOMINGO, Ilocos Sur – STO. DOMINGO, Ilocos Sur – Iti sanguanan ti panagballaag ni Presidente Rodrigo R. Duterte a pannakaipakni dagiti drug dealers ken pushers no ituloyda latta ti illegal nga aramidda, dua a masuspetsa a drug personality ti nagsasaruno a napapatay ditoy nga ili itay nabiit.

Idi rabii ti Hunio 28, napaltogan ni Aris Barcena y Viernes, 41, naasawaan, iti sanguanan ti balayda iti Barangay Poblacion idinto a napaltogan met ni Mario Molina y Palacpac, aka “Boy”, 59, naasawaan, negosiante, ken residente iti Barangay Mira, Bantay, Ilocos Sur, iti asideg ti pagpallotan iti asideg ti bisinidad ti Barangay Poblacion ditoy met laeng nga ili.

Mismo nga inreport ti ama ni Barcena a ni Alejandro Barcena y Tabangin, 69, balo, retirado a maestro ken  residente iti Barangay Poblacion  iti polis ditoy a pinaltogan ti di nabigbig a tao ti anakna iti sango ti balayda idi agarup 11:55 ti rabii ti Hunio 28.

Dagus a nagresponde dagiti polis ket nadatnganda ti biktima a daradara a nakadalutaytay iti sango ti balayda.

Naitaray ti biktima iti Northside Doctors Hospital, Bantay, ngem indeklara ti doktor a nangtaming kenkuana a dead on arrival gapu iti grabe a sugatna iti ulo.

Iti inwayat ti polis a panagimbestiga, naammuan nga idi agarup 8:00 ti rabii ti nadakamat a petsa, rimmuar ti biktima iti balayda tapno gumatang iti sigarilio bayat ti mapapati a panangurayna kadagiti di nainaganan a gagayyemna iti plasa ti ili.

Idi agarup 11:50 ti rabii, nakangeg ti kalib-in ti biktima a ni Marianne Atendido y Quarte, 39, iti  kanalbuong iti sanguanan ti balayda ket simmirip iti tawa. Nakitana ti biktima a naidalutaytay iti ruangan ket nagpatulong iti ama ti biktima.

Kas maibatay iti rekord ti kapolisan, nakasuan ni Barcena iti panaglabsing iti Section 11 ti RA 9165 idi Abril 24, 2014 babaen ti NPS Docket No. I-03-INQ-14h-00146 ken sabali pay a kaso a panaglabsing met laeng iti RA 9165 gapu iti pannakatiliwna a madama ti pot session idi Disiembre 2, 2014 a naipababaen iti NPS Docket No. I-03-INQ-14L-00207.

Iti panagpalutpot ti SOCO team ti Ilocos Sur Provincial Crime Laboratory Office, nakarekobreda iti maysa a naiputok a cartridge case ti cal. 45 ken maysa a deformed slug iti crime scene.

Kabayatanna, pimmusay ni Molina bayat ti pannakataming dagiti sugatna iti nakaitarayanna nga ospital   sumagmamano nga oras kalpasan a napaltogan idi agarup 6:30 ti malem ti Hunio 30, iti asideg ti Sto. Domingo Cockpit Arena a nakigalieraanna.

Kas maibatay iti report ti polis, bayat ti pannagna da Molina, kaduana da Arnel Adaya y Adaya, 49, naasawaan, ken residente iti Barangay Balaleng; ken Rodel Abad y Barroga, 38, awanan asawa, ken residente iti Barangay Buquig, Bantay, Ilocos Sur, nga agturong iti nakaiparkingan ti Mitshubishi Pajero a kotsena, kellaat a nagparang ti di nabigbig a suspek ket pinaltoganna iti sumagmamano a beses ti biktima a nagsagrapan daytoy iti sugat iti gurong ken tianna.

Idi sumangpet dagiti nagresponde a polis, naitarayen da Arjay Presto y Adriatico, 28, awanan asawa, ken residente iti Brgy Ora, Bantay, Ilocos Sur ken maysa nga Alain Pamintuan y Sevilleja, 29,  residente iti Brgy Nambaran, Sto. Domingo, Ilocos Sur, ti biktima iti Northside Doctor’s Hospital nga inaramatda ti kotse daytoy.

Iti panangproseso ti SOCO Team iti crime scene, nakarekobreda iti uppat a kapsula manipud iti cal. 45 iti nakapaltogan ni Molina.

Segun iti report, adda ni Molina iti babaen ti drug personality watch list ti Bantay police station.

Agtultuloy ti panagimbestiga ti kapolisan mainaig iti dua a kaso ti pammaltog.

Maysa kadagiti kari ni Presidente Duterte bayat ti panagkakampania iti napalabas nga eleksion ti panangpugipogna kadagiti drug lords ken pushers.

Iti kaudian a report, addan nakurang a 100 a natay a drug lords ken pushers kadagiti nagsasaruno nga operasion ken engkuentro iti kapolisan. (Tawid News Team)

Comments are closed.