Footer

Barangay kagawad, nagbekkel

STO. DOMINGO, Ilocos Sur – Duan a rabii a saan a naggawid daytoy barangay kagawad isu a sinapul ti pamiliana. Nasarakanda ti kagawad ngem nakabitin metten a bangkay iti uneg ti maysa a kubo.

Simmikkilen ti bangkay ni Elson Tesorio y Adriatico, 39, naasawaan, kagawad ti Barangay Cabaritan ditoy nga ili idi naireport iti police station idi agarup 6:10 ti agsapa ti Hunio 28.

Dagiti utangna gapu iti sugal ti masuspetsa a gapu iti panagbekkel ni Tesorio.

Naammuan iti panagimbestiga dagiti polis a sakbay ti panagbekkelna, dakkel ti abak ni Tesorio iti dado iti maysa a natayan sadiay Barangay Pussuac ket naisaldana pay ti motorsiklona iti P5,000.00.

Segun iti report, adda pay utang ti biktima kadagiti kaarrubana.

Kiniddaw ti kapolisan ditoy ti panangproseso ti SOCO Team, Ilocos Sur Provincial Crime Laboratory Office iti crime scene tapno maammuan no nagbekkel ti kagawad.#

Comments are closed.