Footer

Drug pusher, nanabtuog iti buy-bust operation

CANDON CITY – Sabali pay a drug pusher ti natnag iti ima ti polis babaen ti buy bust operation nga impakatda idi malem ti Hunio 30.

Nabigbig ti suspek a ni Richmond Galaites Gadia, 33, awanan asawa, tricycle driver, ken residente iti Barangay Darapidap ditoy siudad.

Nakumpiska iti ikut ni Galaites ti maysa a pedaso ti  bassit a heat-sealed transparent plastic sachet a naglaon iti masuspetsa a  shabu a naaramat iti transaksion, 2 pedaso nga small heat sealed transparent plastic sachet a nagkarga iti masuspetsa a shabu, maysa a  cellular phone, P270.00 iti nadumaduma a denominasion, P800.00 a buy bust money, ken TMX motorized tricycle nga inaramat ti suspek iti panaglakona iti droga.

Karaman ti suspek iti drug target list ti Candon City police.

Naipan ti suspek iti police station para iti dokumentasion ken umisu a disposision.

Kabayatanna, inaresto dagiti polis-Cabugao ni Justine Leo Ramos y Serdenia, 23, awanan asawa,  Ilocos Sur iti pagtaenganna sadiay Barangay Sisim, Cabugao, idi agsapa ti Hunio 30 babaen ti bileg ti warrant of arrest nga inyisio ni Judge Nida Bringas Alejandro ti Regional Trial Court, Branch 24, Cabugao, Ilocos Sur idi pay laeng Agosto 20, 2015.

Sumangsango ni Ramos iti panaglabsing iti Section 11 ti RA 9165 ket nairekomenda nga agpiansa iti P200,000.00.

Nakalista ni Ramos a Top 4 most wanted person iti Manhunt Charlie, Municipal Level ken target list mainaig iti droga.#