Footer

EDITORIAL: Panagsapata ni Presidente Rodrigo Duterte

PANANGPARMEK ti krimen ken kurapsion, panangpasubli kadagiti mapukpukawen a tagipatgen a galad ken karirikna, ken panagkaykaysa dagiti umili para iti nasaysayaat a Pilipinas.

Dagitoy ti nabatad nga awis para ti napudno a panagbalbaliw nga inyetnag ni Presidente Rodrigo Duterte kadagiti amin nga umili a Pilipino kabayatan ti Inaugural Address-na kalpasan ti panagsapatana a maika-16 a Presidente ti Pilipinas sadiay Rizal Ceremonial Hall ti Malacañang Palace idi agmatuon ti Hunio 30, 2016.

Naiduma a personalidad ni Duterte ti nakita dagiti tattao iti dayta a pasken. Saan a nagsao ti dakes, saan a nagilunod wenno nagipangta ti panagpatay kas ti impakpakitana kadagiti naglabas a tiempo manipud idi panawen ti kampania. Ngem nagparang kas maysa a natakneng ken natibker a lider a disidido a mangipatungpal kadagiti karina idi panawen ti kampania a mangpaksiat ti kriminalidad ken kurapsion, ken isubli ti talek ken kompiansa dagiti umili kadagiti opisial ken agserserbi iti gobierno.

Impatalgedna a kas abogado ken sigud a piskal, ammona ti pagpatinggaan ti bileg ken autoridad ti Presidente, no ania ti legal wenno saan. Impasingkedna ti saan a maikompromiso a panangbigbigna ti umno a proseso ken panagturay ti linteg. Impalagipna a nabutosan isuna iti kina-Presidente tapno agserbi iti sibubukel a pagilian, saan ketdi a para ti interes ti maysa a grupo wenno klase, agserbi iti amin, saan laeng a maymaysa.

Nabiit, nalawag ken napnuan ti kaipapanan ti Inaugural Address ni Duterte kalpasan ti panangpasapata kenkuana ni Supreme Court Associate Justice Bienvenido Reyes iti imatang dagiti nasurok a 600 a bisita pakairamanan dagiti kameng ti gabinetena, Kongreso, Hudikatura ken Diplomatic Corps.

Dimmar-ay pay da sigud a Presidente Fidel Ramos ken Joseph Estrada. Saanen a binuya ni Outgoing President Benigno Aquino III ta nagawiden kalpasan ti ceremonial turn-over ti kina-pangulo.  Awan met ni sigud a Presidente Gloria Arroyo ta naka-hospital arrest pay laeng gapu kadagiti sangsanguenna a kaso.

Ti Inaugural Address ni Duterte ket umasping met laeng kadagiti diskurso dagiti sinarunona a presidente a nabutosan iti salinong ti 1987 Constitution. Agpapadada a nabagas ken nasam-it ti pannakaisawangda. Agpapadada iti bugas a mangiyaw-awis ti panagkaykaysa dagiti Pilipino para iti nasaysayaat a pagilian.

Adu dagiti umili a sitatalek ken magagaran unay ti pannakatungpal kadagiti kari ni Duterte nangruna kadagiti nangibotos kenkuana. Ngem adu met dagiti umili ti saanen a nalaka a mamati kenkuana gapu kadagiti paliiw ken padasda kadagiti aramid ken gapuanan dagiti naglabas nga administrasion.

Adu dagiti umili ti agdudua kadagiti kameng ti gabinete ken kadagiti nangato nga opisial ti baro nga administrasion gapu ta daandan a nagan ken nagserserbidan kadagiti nagkauna a presidente.  Iti kadagupan dagiti nagadu a Pilipino, dagiti koma amin a nadutokan ket dagiti napaneknekanen ti kabaelanda ken saan a mapagduduaan ti integridadda tapno awan koma pulos ti mantia ti panagtalek dagiti umili kadakuada.

Nasayaat unay ti awis ni Duterte a panagkaykaysa dagiti umili a tumulong kenkuana tapno matungpalna dagiti karina ta uray pay adu a botos ti nangarusanna kadagiti amin a nakasalisalna idi napalabas nga eleksion, ket maibilang latta a minority president isuna ta ad-adu nga amang ti pakadagupan dagiti amin a botos dagiti nakasalisalna.

Para kadagiti amin a Pilipino – bimmotos man wenno saan ken ni Duterte – nasken ti panangsuporta kadagiti gannuat ti Baro nga Administrasion a mangiturong ti rienda ti gobierno ti pagilian para ti sapasap a pagsayaatan dagiti umili. Nasken met ti panagridam dagiti umili tapno saan a mayaw-awan iti pagturongan nga umno a dalan para ti naraniag a masakbayan ti pagilian. (Eden A. Alviar)

Comments are closed.