Footer

SINURSURAN: Isuda a Taklintayo iti Linak ken Kappia…

PANNAKABAGI ti linteg. Pulis. Man in uniform. Sumagmamano laeng nga awagtayo kadakuada. Akemda ti mangkita ken mamagtalinaed ti kappia iti masakupanda. Kangrunaan a kakinnayammet iti inaldaw-aldaw tapno masigurado nga awan riribuk a rumsua/maparnuay.

Mapalpaliiw nga aktiboda ita iti akemda. Kanigid-kanawan ti panagtiliwda kadagiti adda pakainaiganna iti droga. Kayatda, change is coming met ti mapasamak iti grupoda. Naimbag la unay ta maksayan no di man maminpinsan a maguped daytoy nga aramid a pagam-amkan ti kaaduan. Saan kanon a natalged ti maamitan iti dalan ta agkaraiwara dagiti adik. Di la mamin-ano ti mabiktima.

Pudno man met ngamin a dakkel ti responsibilidad ti nakapatay iti takiag dagiti otoridadtayo. Kas pudpudno nga umili, masapul ti pannakibadangtayo kadakuada. Didanto pulos nga agballigi no saantayo ida a tulongan.

Ngem kitaentayo man, aya, ti padas ni Mang Itto. Mano laengen a kalgaw, sumagpaten a pitopulona. Ketdi, napigsa pay laeng ta inaldaw latta iti bangkag a pagmulmulaanna.

Nasingpet, daydayawenda iti barangayda. Saan nga agsigarilio; sumimsim laeng iti arak a kas pagpaimasna iti kaan no kasta a sumipnget. Ti anakna a babai, nakaasawa iti adda loklokona no kasta a maayusan ti makaulaw. Ngem limpio met no di nakalidok.

Iti kinabartek ti manugangna a lalaki, addada metten nakain-innalana daytoy iti sao. Maysa ditan ni Sabas (saanna a pudno a nagan) a kaarrubada. Ngem inton mausawanen, kagayyemannanto manen dagita a nakaapana.

Iti maysa nga agsapa, kabayatan a tartarimaanen ti manugang (ilingedtayo iti nagan nga Aggi) ni Mang Itto ti traysikel daytoy, kellaat lattan a dimteng iti solar ni Sabas. Makapungtot ken nabartek. Sinsao, pinampiangna ni Aggi iti baso iti agsumbangir a pispisna babaen kadagiti baso a nakita daytoy iti tugaw iti sikigan ti lugan. Nabtak ti maysa a baso.

Naklaat ni Aggi, kasta metten ti maysa a barkadana (Ambong, kunatayo lattan) a katulonganna a mangikabkabit iti kaipabpabulkanays a pilid idiay ili. Nataranta. Inraman pay ni Sabas ni Ambong. Dinanogna daytoy. Immawer ni Ambong iti kaarruba idinto a nagdiretso ni Aggi iti uneg ti balayda sa sipapardas nga inrikepna.

Pinnanakpak iti sao. Idi saan a mastrek ni Sabas ni Aggi (a kaduana ni baketna a manarimaan nga agsuksukat ta mapanda aglako koma iti inangkatda nga ikan apaman a malpas ti lugan), pimmanaw daytoy. Apagbiit sa nagsubli nga addan iggemna a buriki (‘tay pangtudokda iti sangasako nga irik tapno kitaen dagiti aggatang no nasayaat met laeng ti bilagna).

Agmamarammangen dagiti tattao. Ngem awan maaramidanda ta saanen nga ipangpangag ni Sabas ti pananganawada kenkuana. Saan payen a maasitgan ti tanod nga immuna a nangatipa kenkuana ta adda ngarud burikina.

“Naka-high la ketdi manen,” kinunada a ti kayatda a sawen, nakasusop iti maiparit nga agas. “Saan a kasta ti kapigsa ken katuredna no nabartek laeng koma.”

Gapu ta di makastrek ni Sabas iti balay, nangala iti kayo ket pinatitna ti tawa a sarming iti batog ti kuarto. Nabtak dagitoy. Saan pay a napnek. Nagturong iti kosina ket inkugtakugtarna ti ruangan. Naidulin idin ni Aning (asawa ni Aggi ) nga anak ni Mang Itto dagiti buneng tapno di mairubo ti asawana a makapungtot la unay metten.

Binilin ni Aggi a no makastrek ni Sabas iti kosina ta saan a nakananama ti rikep daytoy a plywood, agtaray daytoyen iti ridaw iti sango tapno agpaarayat kadagiti konsehal wenno iti kapitan.

Iti kakukugtar ni Sabas iti rikep ti ridaw, naluktanna daytoy. Saan metten a nagpa-mayang ni Aning ket limias iti sango. Inwaradiwad met a dagus ni Sabas ti burikina idi makastrek. Ngem sakbay a naigam-udna ti armasna, naipak-olen kenkuana ni Aggi ti martilio a naiggamanna. Naarriweng ni Sabas ket inyarisadsadna manen ti buriki. Ket addayta manen ti dua pay a pak-ol iti ulona. Naawananen iti puot ket nadigos iti bukodna a dara iti mismo nga uneg ti balay.

Timmaray metten ni Aggi a rimmuar ta amkenna no rauten dagiti kabagian ti biktima. Ngem naipukkawna iti asawana nga adda nga agpapaarayat kadagiti agmamarammang a tattao nga adda sugatna. Nagdiretso daytoy iti dalan a lumasat kadagiti piskaria iti abagatan.

Simmangpet dagiti otoridad. Inluganda ni Sabas nga intaray iti ospital a sipu-puoten idi dumtengda. Iti ragup dagiti tao, nangngegda pay a nagpangta iti paltog ti kasinsin ti biktima. Kasta metten a permi a nagpungtot met ti maysa a konsehal nga uliteg ni Sabas. Kayatdan a leppasen ni Aggi ngem naimbag ta addan dagiti polis kadagidi a panawen.

Kalpasan ti sumagmamano a minuto, nagsubli met laeng dagiti pulis (ngem sabalin ti dadduma kadakuada). Isu metten a dumteng ni Mang Itto a naggapu idiay ili a nangitulodanna iti asawana nga aglakolako iti nateng.

Binirok dagiti pulis ni Aggi ngem awan a nakitada. Kasta met nga awan ti makaibaga idin no yanna ta nagtaray ngaruden iti butengna iti napasamak. Pagdaksanna, adda pay “astang-astig” ti immay a maysa a baro kadakuada. Iti reaksionna idi awaganna iti megaphone-da ni Aggi, ni Aggi lattan ti akimbasol iti amin.

Pimmanaw met laeng dagitoy idi awan ni Aggi a tiliwenda koma. Kadagidi met a gundaway, adda nakai-baga ken ni Mang Itto a nakitada ni Aggi a natnag iti piskaria iti panagtarayna iti tambak. Saanen a makakunail. Kapilitan nga inkaratilia ni Mang Itto ti manugangna ket pinabpabalesna ti bagi daytoy iti balayda.

(Adda tuloyna)

Comments are closed.