Footer

14 drug pusher nanabtuog iti makalawas nga operasion ti droga

CAMP ELPIDIO QUIRINO, BANTAY, Ilocos Sur – Sangapulo ket uppat a tattao ti inaresto ti kapolisan iti inwayatda a makalawas a nga operasion kas panagtungpal iti impakdaar ni Presidente Rodrigo Duterte nga all-out war kontra droga.

Iti report manipud iti Ilocos Sur Police Provincial Office, manipud Hulio 1 agingga iti Hulio 6, lima a drug pushers ti natiliw iti Vigan City, dua iti Bantay, idinto a saggaysa iti Sinait, Cabugao, Sta. Catalina, Tagudin, Burgos, Narvacan, ken San Esteban.

Iti umuna nga aldaw ti bulan ti Hulio nga operasion ti droga ti kapolisan ti Vigan, naaresto da Johnny Abenojar Amay, 43 ken ti kalib-inna a ni Alice Andallo, 40, agpada a residente iti Barangay VIII ken agpada nga adda iti watch list ti Vigan City Police Station kalpasan a nakakumpiska dagiti polis iti tallo a heat sealed plastic sachet a masuspetsa a naglaon iti shabu ken assorted drug paraphernalia iti ikutda.

Bayat ti operasion, natiliw ni Mark Anthony Barsatan Aquino, 28, residente iti Barangay Salindeg, ngem nakalibas da Davis Quitoriano Corpuz, residente iti Don Alejandro Quirolgico ken dua a suspek.

Iti sabali nga operasion nga inwayat ti nagtitipon nga elemento ti Vigan CPS, CIDT, PDEA, PIB KEN PAIDSOTG iti daytoy met la nga aldaw, naaresto da Randy Amarillo Arguilla, 41, awanan asawa; ken ni Rollan Amarillo Arguilla, 42, naasawaan, agpada a residente iti Barangay Pong-ol, Vigan City kalpasan a  nakasamsam ti kapolisan iti tallo a heat sealed plastic sachets kadakuada.

Iti daytoy met la a petsa, inaresto dagiti polis iti panangidaulo ni Inspector Edmund Sarmiento Artates ni Arnel Jacob y Ramos, 34, residente iti Barangay Barbar, San Juan, Ilocos Sur kalpasan a nakakumpiskada iti droga ken glass tube tooter iti uneg ti up-upaan daytoy a kuarto sadiay Barangay Balaleng Centro, Bantay.

Mismo a ti kalib-in ni Jacob a ni Charnelle Dela Cruz y Delos Santos, 28, ti nangipulong kenkuana iti polis a madama ti panagshabuna iti up-upaanda a balay.

Idi agarup 9:10 ti rabii ti Hulio 1, natiliw iti buy bust operation ni Nelson Pescador y Patubo, 37, naasawaan, tricycle driver ken residente iti Barangay Balaleng Centro, iti sango ti Jollibee.

Nakakumpiska dagiti polis iti dua a plastic sachet a naglaon iti mapapati a shabu ken narekobreda ti P500.00 a marked money a nausar iti transaksion ti droga.

Nakalista ni Pescador a target drug personality iti Bantay Police Station.

Iti daytoy met la a petsa, positibo ti resulta ti drug buy bust operation nga inwayat ti PAIDSOTG ISURPPO, PIB ISURPPO, CIDT ISUR, PDEA ISSET-1 ken Cabugao police station sadiay Sitio Balaywak, Barangay Pug-os, Cabugao maikontra ken ni Hipolito Bayani, Jr. y Azcueta, 27.

Nabigbig ti kaduana a ni Ernesto Sera y Serna, 47, ngem nakalibas daytoy. Nakalista ni Sera iti drug watch, municipal level.

Malaksid ti nagatang ti buyer-poseur a plastic sachet a naglaon iti mapapati a shabu, narekobre pay dagiti polis ti namarkaan a P500.00 a naaramat iti transaksion. Sabali laeng dagiti nakumpiskada a dua a plastic sachet a mapapati a nagkarga iti shabu a naggian iti pouch ken dagiti drug paraphernalia.

Idi agarup tengnga ti aldaw daytoy a petsa, sinukisok dagiti polis-Sinait, ISPAIDSOTG, ISPIB, Maritime Group Ilocos Sur ken ISCIDG iti panangidaulo ni Chief Inspector Richard D. Palay ti balay ni Marc June Peralta Quebral, 27, ken residente iti Barangay Sabangan, Sinait, ket nakakumpiskada iti dua a heat sealed plastic sachet a naglaon iti masuspetsa a shabu.

Awan ni Peralta idi naiwayat ti panagsukisok.

Idi agarup 11:00 ti rabii ti Hulio 1, naaresto ni Mark James Antiporda y Estanislao, 27, residente iti Barangay Ayusan, Vigan City bayat ti panaglakona iti droga iti asideg ti arko sadiay Barangay Cabuloan. Nakakumpiska dagiti polis iti dua a heat sealed plastic sachet a naglaon iti mapapati a shabu ken P800.00.

Kabayatanna, nagpullo ti maysa a barangay kagawad iti illegal nga aktibidadna kalpasan a naaresto iti buy bust operation iti igid ti national highway iti sanguanan ti Narvacan Mall sadiay Sitio Limmansangan, Barangay Margaay, Narvacan idi rabii ti Hulio 4.

Nabigbig ti kagawad a ni Edgar Valentino y Soria, 54, naasawaan, ken residente iti Sitio Kapungkawan, Barangay Sta. Lucia ditoy met la nga ili.

Nakalista ni Valentino a drug personality iti ili a Narvacan.

Naipaiman ti kasona iti provincial prosecutor.

Maysa met a tricycle driver ti nasiloan babaen iti buy bust operation ti polis-Tagudin sadiay Barangay Dardarat idi aldaw ti Hulio 5.

Nakumpiska iti ikut ni Ronie Leal Ladia, 37, residente iti Barangay Libtong, Tagudin iti dua a plastic sachet a naglaon iti mapapati a shabu ken P500.00 a buy bust money.

Mannalon a taga-Barangay Mambug, Burgos, Ilocos Sur ngem temporario nga aggigian iti Barangay Poblacion, Sta. Maria ti simmaruno a nanabtuog iti ima dagiti polis babaen ti buy bust operation idi Hulio 5.

Napilaan ni Rex Domingo y  Almazan, 34, iti panaglabsing iti RA 9165 iti babaen ti CC No. 4178-N ken 4178-N ket nairekomenda nga agpiansa iti P200,000.00.

Sabali laeng ti buy bust operation nga inwayat ti San Esteban police station sadiay Sitio Musot, Barangay Apatot, San Esteban, Ilocos Sur a nagresulta iti pannakaaresto ni Christian Egar y Baldeviso, 24, tricycle driver.

Napilaan metten iti kaso a panaglabsing iti RA 9165 maikontra ken ni Egar (Tawid News Team)

 

Comments are closed.