Footer

BANNER NEWS: Nakumpiska a 180 kilos a shabu, masuspetsa a maiwaras iti Ilocos, Cagayan, Cordillera

CLAVERIA, Cagayan – Masuspetsa a maiwaras iti Ilocos, Region 2 ken Cordillera ti 180 kilos a high-grade shabu nga agbalor iti P900 million a nakumpiska dagiti nagtitipon nga elemento ti kapolisan iti maysa a  bangkag sadiay Barangay Culao, Claveria, Cagayan idi Hulio 3 .

Kanaig daytoy, kinuna ni Police Senior Supt. Albert Ignatius D. Ferro, nangidaulo iti PNP Anti-Illegal Drugs Group, nga itultuloyda ti agimbestiga no sadino ti naggapuan daytoy dakkel a bulto ti shabu, no naipuslitda wenno napartuatda iti lokal a pasilidad ti droga.

Innayon ni Ferro a nagpatulongda iti PDEA iti pannakainbestiga iti nagtaudan ti nakumpiska a droga a masuspetsa a paset ti dakkel a bulto ti shabu a naipuslit iti pagilian itay nabiit babaen ti maysa a ganggannaet a sindikato ti droga a nailasat iti saan a naguardiaan a paset ti kabaybayan ti Cagayan.

Kinuna ni Ferro a mabirbirok ti akinkukua iti bangkag idinto nga inyebkasna ti posibilidad nga adda sekreto a laboratorio ti shabu a kukua ti maysa a Taiwanese iti probinsia.

Karaman iti raiding team a nangsuporta iti PNP-AIDG ti Special Action Force nga indauluan ni Supt. Abraham Abayari; Custom-Intelligence Group nga indauluan ni Neil Estrella; ti Ilocos Norte Police Provincial Office iti panangidaulo ni Senior Supt. Jose Melencio C. Nartatez Jr.; ti Cagayan Police Provincial Office iti panangidaulo ni Senior Supt. Ronaldo Olay; ken ti  PDEA Regional Office 2 iti babaen ni Director Derrick Arnold Carreon.

Nagresulta ti operasion iti pannakarekobre ti 180 plastic packs a mapattapatta nga agbalor iti P900 million ti masuspetsa a shabu a naikabil iti pito a nangisit a bag nga addaan marka a “Leah D” ken maysa a dakkel nga asul nga ice box.

Maysa a di nabigbig nga impormante ti nangitip iti kapolisan mainaig kadagiti naikali a droga.

Agarup 30 nga oras a nagsawar ti PNP-AIDG team  sakbayda a nasapulan ti naikali a droga iti maysa a naabandonar a bangkag a mapapati a kukua ti maysa a Rene de Maya.

Addan iti kustodia ti PDEA dagiti nakumpiska a droga.

Kinuna ni PDEA Director Isidro Lapeña a maguardiaan dagiti nakumpiska a droga iti PDEA Laboratory Service tapno saanda a maresiklo ken madadaelda a dagus no adda pammilin ti korte.

Kabayatanna, kinuna ni PNP Chief, Director General Ronald “Bato” Dela Rosa nga inkali dagiti akinkukua dagiti droga agsipud ta addan butengda a maarestoda iti mabiit.

Segun ken ni Dela Rosa, maideliber koma dagiti droga iti Binondo ngem nagbuteng ti sindikato iti ballaag ni Presidente Duterte ket inkeddengda nga ikali dagitoy.

Kinuna ni Dela Rosa nga isingasingna ken ni Presidente Duterte ti pannakaited iti gunggona iti impormante. (Tawid News Team)

 

Comments are closed.