Footer

EDITORIAL: Dagiti Pulis ken Drug Lord

NAKLAAT ti intero a Pilipinas iti panangibutaktak ni Presidente Rodrigo Duterte kadagiti dua a retirado a heneral ken tallo nga aktibo a heneral iti Philippine National Police a kas protector dagiti agnegnegosio ti illegal a droga iti pagilian.

Innaganan ni Duterte da retired Deputy Director General Marcelo Garbo ken retired Chief Supt. Vicente Loot, Director Joel Pagdilao, Chief Supt. Edgardo Tinio ken Chief Supt. Bernardo Diaz a mangprotprotekta ti komersio ti illegal a droga iti pagilian. Ngem naglibakan dagiti lima a heneral ti pammabasol kadakuada, ken inkarida ti panangdalusda kadagiti naganda ken pannakikooperarda iti maisayangkat nga imbestigasion.

Imbestigaran ti National Police Commission da Pagdilao, Tinio ken Diaz. Ti met Department of Justice ti mangimbestigar ken ni Garbo gapu ta nakapagretiron iti serbisio. Imbestigaran met ti Department of Interior and Local Government ni Loot gapu ta agdama isuna ita a mayor sadiay Daanbantayan, Cebu.

Nabingay ti kapanunotan ken reaksion dagiti umili iti inrakurak ti Presidente. Adda dagiti mamati ken maragsakan ti inaramidna ta sinustenerna ti pananginaganna kadagiti heneral nga immunan nga impalgak ken binallaaganna idi saan pay a nakapagsapata a Presidente. Inaramidna dayta kas shame campaign kadagiti protector ti illegal a droga tapno mapasardengen daytoy iti las-ud ti tallo agingga iti innem a bulan kas inkarina idi panawen ti kampania. Adda met dagiti umili nga agdudua iti kinapudno dagiti alegasion. Kalikagumanda a mapadaras koma ti umno a proseso ken imbestigasion, saan ketdi a trial by publicity ti maisayangkat kontra kadagiti akusado. Patienda a nadagsen ti alegasion ni Duterte ket dakkel ti epektona kadagiti akusado ken dagiti pamiliada. Rumbeng nga idatag ni Duterte dagiti amin nga iggemna nga ebidensia tapno mapasingkedan ti alegasionna. No nalag-an dagiti ebidensia, maabsuelto ken madalusan met ti nagan dagiti akusado.

Insaruno nga innaganan ni Duterte dagiti tallo a kangrunaan a drug lord iti Pilipinas a da Wu Tuan, Peter Lim ken Herbert Colangco. Imbulgaren ti Malacañang ti mapapati a koneksion ni Garbo iti sindikato ti droga kas protector wenno coddler ti Level 5 Drug Triad a kangatuan a lebel ti sindikato manipud iti Mainland China. Babaen ti diagram, naipakita no sadino ti paggappuan ti supply ti droga babaen ti sea shipment manipud China a magna iti transaksion dagiti dua a drug lord – maysa ti nakabalud sadiay National Bilibid Prisons, ni Wu Tuan ken Peter Lim. Ni Wu ket nakakulong sadiay Building 14 ti NBP ken lider ti Bilibid 19, ken mangmanmanehar ti operasion ti droga iti Luzon iti National Capital Region. Ni met Lim ket mapapati nga adda iti ruar ti pagilian, ken isuna ti mangmanmanehar ti operasion ti Triad sadiay Visayas. Naipakaammo nga addan shoot-to-kill order ni Duterte ken ni Lim no sumrek isuna iti Pilipinas.

Iti linia ti diagram ti Malacañang, dagiti dua a drug lord ket atapenda a ni Garbo ti agpapaay a protector. Saan a direkta nga impalgak ti Malacañang no ania ti maal-ala ni Garbo iti Triad kas coddler. Mabalin a dakkel a gatad ti kasukatna ta ti Level 5 Triad ket nasurok a 100 a kilo ti regular a shipment nga agbalor iti billion a pisios.  Malaksid kada Co ken Lim ket napigsa met ti operasion ni Colangco ngem maibasar iti intelligence report ti Malacañang ket awan ti koneksionna ken ni Garbo.

No pudno dagitoy nga alegasion ni Duterte, saanen a nakaskasdaaw no apay a nagraira ti illegal a droga iti pagilian. Kasano ti kaadu dagiti pulis a coddler dagiti drug lord? Sapay koma ta maitultuloy ti imbestigasion ken pannakapudasdas ti pannakainaig dagiti nangato nga opisial ti PNP ken dadduma pay nga ahensia ti  gobierno iti illegal drug trade tapno masolbaren daytoy a parikut ti pagilian. (Eden A. Alviar)