Footer

Impormasion mainaig naikali 180 kilos a shabu, nagtaud iti komunidad: INPPO

LAOAG CITY – Nagtaud ti impormasion nga adda naikali a dakkel a bulto ti droga iti maysa a bangkag sadiay Barangay Culao, Claveria, Cagayan iti maysa nga agnaed iti komunidad, daytoy ti impalgak ti provincial director ditoy a probinsia itay nabiit.

Kinuna ni Ilocos Norte Acting Provincial Director Senior Supt. Jose Melencio C. Nartatez, Jr. a daytoy nga impormasion ti nagsammakedan ti PNP Anti-Illegal Drugs Group (AIDG) iti panangidaulo ni Senior Supt. Albert Ignatius Ferro a nangiwayat iti operasion babaen ti pannakakinnamayyet ti Special Action Force nga indauluan ni Supt. Abraham Abayari; Custom-Intelligence Group nga indauluan ni Neil Estrella;  ti Cagayan Police Provincial Office iti panangidaulo ni Senior Supt. Ronaldo Olay; ti  PDEA Regional Office 2 iti babaen ni Director Derrick Arnold Carreon; ken ti Ilocos Norte Police Provincial Office a nagresulta iti pannakakumpiska ti 180 kilos a shabu nga agbalor iti P900 million.

Agarup 30 nga oras idi Hulio 3 a nagsawar dagiti operatiba sakbay a narekobreda dagiti droga a naikali iti bangkag a kukua ti maysa a Rene de Maya sadiay Barangay Culao, Claveria, Cagayan.

Birbiroken ita dagiti polis ti akinkukua iti bangkag.

Kinuna ni Nartatez a nakipaset ti Ilocos Norte Provincial Police Office iti nasao nga operasion tapno “masigurado a masapulan (dagiti droga) agsipud iti assumption a maiwaras iti Ilocos Norte ti paset ti nasao a kontrabando.

Kinuna ni Nartatez a bumasbassit dagiti kontrabando a maiserrek iti Ilocos Norte idinto nga umad-adu ti bilang dagiti maaresto, pakakitaan a mangrugin a marigatan dagiti pushers nga agiwaras iti droga.

Segun ken ni Nartatez, agdagupen iti 190 a personalidad ti natiliw manipud Enero agingga iti Hunio 2016, ad-adu nga amang no maikumpara iti nakurang a 100 iti dayta met la a tiempo kadagiti napalabas a tawen.

Kinuna ni Nartatez a nakapukos ti INPPO iti pannakaibassit ti demand ken suplay.

Tapno bumassit ti demand, kinuna ti acting provincial director nga aktibo nga ikamkampaniada kontra iti panagaramat iti droga kadagiti pagadalan, barangay ken pagteng, idinto a napabassitda ti suplay babaen ti nainget ken agtultuloy a panagtiliwda ken operasion maikontra iti droga.

Impalgak ni Nartatez a daldalusan ti INPPO ti ranggona babaen iti panangiwayatna iti mandatory drug testing kadagiti amin a police personnel. Nakumpleto ti drug testing idi Hulio 8.

Kinuna ni Nartatez nga adu a pusher ken user iti probinsia ti nakalinia a sumuko, ngem adu ti agguddeguddeng gapu iti pakdaar a sumuko dagitoy iti local chief executive ken ipalgakda ti pagtaudan ti suplay ti illegal a droga.

Kadagiti drug pushers, kinuna ni Nartates: “Ania ti maay ti isusuko no… isukom laeng ti bagim? Isukom dagiti drogam ken paraphernaliam.”

Kinuna ni Nartatez a kasapulan ti napigsa a partisipasion ti komunidad para iti pannakapugipog iti droga iti probinsia. (Tawid News Team, karaman ti report ni Mizpah Grace G. Castro, PGIN-CMO)

Comments are closed.