Footer

SINURSURAN: Isuda a Taklintayo iti Linak ken Kappia…

Kolum ni Jobert M. Pacnis

(Maudi a Paset)

Dita a nakita ni Mang Itto nga adda nagnaan ti buriki iti barukong ken tian ni Aggi. Sabali laeng dagiti kimdias iti likud ken bakrangna. Adda pay sugat ni Aning ta naparsiakan gayam kadagiti nabtak a sarming ti tawa idi ta manarimaanen nga agsukat ta mapanda koma ngaruden aglako iti ikan apaman a maiplastar ti pilid ti lugan.

Idi mailugan koman ni Aggi iti napaayaban a traysikel, kellaat manen a naglusdoy ta agkapsut kano ti riknana. Naalan ti asawana ti nagdanag ta amangan no nauneg ti nadanon ti buriki.

Gapu ta amkenda nga adda pay laeng ni Sabas iti emergency, inkeddeng ni Aning nga ipan ti asawana iti kabangibangda a probinsia nga agarup 40 minuto laeng ti biahe. Ngem sakbayna, napanda iti kuerpo ti pulisia ta ipakadada met laeng ti amin.

Ditoy, imbaga dagiti pulis ti SOP-da a masapul a maitaray ni Aggi iti kaasitgan nga ospital (isu dayta met laeng ti nakaitarayan ni Sabas). Ket kuyogenda ni Aggi tapno masierto ti seguridadna. Immannugot ni Aning.

Binayabay ngarud ti dua a pulis (sabali manen dagitoy ngem kadagiti immuna ken maikadua a grupo dagiti pulis a nagresponde) da Aning a napan iti emergency. Naammuanda a nakaruar met laeng gayamen ni Sabas kalpasan a nadait ti tallo a sugatna.

Gapu ta ag-vomit,  agkapsut ken bimmaba iti husto ti BP ni Aggi, pinakatanda a dagus ti suero ken oxygen. Inkalukag met a dagus ni Aning ti pannakayalis ti asawana iti kabangibang a probinsia a yan dagiti kakabsat ni lakayna ta isu ti kiddaw dagitoy.

Iti uneg ti ospital, dinamag dagiti dua a pulis ti napasamak. Ngem ti yanna nga adat, idi papirmaanda ken ni Aning ti insuratda, maysa met laengen a dayalogo a kasla ni Aggi ti agsasao a pagkunkunaanna a ni Sabas ti nangbagkong kenkuana.

“Masapul dayta tapno no dakes ti mapasamakna,” kinuna ti maysa kadagiti pulis a ni Aggi ti kayatna a sawen, “adda masinunuo a tao a pik-apenmi.”

Naawanen ti sibubukel a pasamak. Awanen ti statement maipanggep iti pangta a naggapu kadagiti kabagian ni Sabas. Ken ti napasamak a panangraut ken panagdadael.

Agalaunan idi maitaray iti kabangibang a probinsia ni Aggi. Ngem bayat ti kaaddana iti ospital, napan man gayamen ni Sabas nga adda iggemna a tabas iti balayda. Dagiti dua (edad katorse ken tallo) kadagiti tallo nga annak ni Aggi ti nadanonna iti balay nupay nagpatingga laeng iti paraangan.

Dinamag ni  Sabas kadagiti ubbing ni Aggi.

“A-awan, angkel… ad-addada ‘diay ospital da papang,” agtigtigerger a sungbat ti balasitang nga anak ni Aggi. Sada limias met laeng a nagna iti sango sa nagtartarayda nga agkabsat a napan iti yan da lilongna a Mang Itto.

Sakbay a pimmanaw ni Sabas, nakita dagiti ubbing a tinagbat daytoy ti akinsango a pilid ti traysikel. Napan a dagus kinita ni Mang Itto a sipupungtoten ngem naimbag ta awanen ni Sabas. Inreport a dagus ni Mang Itto ti napasamak kadagiti pulis.

“Umaykami madamdama,” kinuna lattan dagitoy ta bin-igda a makumikom nga agbuybuya iti NBA finals, game 3. A tinungpalda met, piman, ngem adun a kanito ti naglabas.

A ti rumsua a saludsod, rumbeng kadi a pagurayem dagiti umay ag-blotter iti nakain-inaka a pasamak? Napatpateg ti buybuyaenda?

Iti panagsubli dagiti pulis a nangkita iti natagbat a pilid ti lugan, maymaysa ti konklusionda: natadem ti naaramat ta uray la nauyak ti exterior. No sinsinan laeng ti tadem, nagkalkag la ketdi.

Ditoy metten nga innalada iti presinto ni Sabas nga adda idin a matmaturog iti sirok ti kayo ti kaarrubada idi dumteng dagiti pulis.

Attempted murder, dayta ti nalawag kadayta a kaso. Namitlo a ginandat ni Sabas ti biag ni Aggi gapu laeng kadagiti naidandanon kenkuana a sao ti naud-udi a dina met napaneknekan.

Idi mapan ni Mang Ittoiti kapitan ta isu ti naibilin, kalpasan ti pannakakumikomna iti pannakaitaray ni Aggi iti ospital, kuna daytoy kenkuana:

“Adda blotter ni Sabas idi a pinangtaan kano ni Aggi, ‘tang.”

“Uray payen, a, kapitan, ta, ney, simrek metten iti balay.” Kayat koma pay nga inayon ni Mang Itto ngem linapdanna ti bagina: no agpayso nga adda blotter, apay a dimo pinagsango ida, kap, aglalo ket pangta daytan? Wenno kadagitoy la a nagreklamoda?

Nga idi agangay, rimmuar a ti gayam nagpupungtotan la unay ni Sabas ket ti naidanon kenkuana a pabuldoser kano ni Aggi ti balayda iti di met nadakamat a rason. Ti dakes, idi idanon dayta ti maysa met laeng a kainninumanda, kaab-abak ni Sabas iti disisais mil iti natayan ket madama nga agin-inum iti sakit ti nakemna. Isu a narubroban ti madi a rikriknana ket rinautnan ni Aggi.

Ti maysa pay a lagidawen ni Mang Itto, iti namitlo a daras nga ipapan dagiti pulis iti nakapasamakan ti riribuk, saanda man laeng a pulos a simrek iti balay tapno kitaenda koma dagiti nagsayasay a dara iti uneg ken dagiti nadadael. Dida pulos nga inalaan ti ladawan dagiti ebidensia ken paspasamak. Naimbag la ketdin ta isu met a dumteng idi ti maysa pay nga anak ni Mang Itto ket daytoy ti nagala iti ladawan ken bideo ta ammona a masapulto dagitoy iti masakbayan.

Gapu ngata ta nababa laeng ti pamilia da Mang Itto (nanumo nga agbangbangkag) isu a dida inaramid ti pudno nga akemda? Wenno gapu ta adda pannakikabagian ni Sabas iti maysa kadagiti nagresponde? Wenno ammoda nga agtrabtrabaho iti munisipio ti kasinsin ni Sabas nga isu pay ti nagpangta a paltoganna ni Aggi no makitana?

Maysa laeng daytoy kadagiti pasamak a ditayo koma kayat a madamagtayo. Ngem isu ti agdadata a kinapudno no maminsan. Sapay ta iti iseserrek ti baro nga administrasion, madalusan dagiti itta. Dumteng ti panagbalbaliw ket maipaay ti patas a pannakatrato dagiti umili.#