Footer

19 mayors, 27 ABC presidents, nagpa-drug test

VIGAN CITY – Tapno maipakitada a sinseroda iti kampania maikontra iti droga, sangapulo ket siam a mayor ken 27 a presidente iti Association of Barangay Chairman iti Ilocos Sur ti nagpaeksamen iti droga  sadiay provincial capitol idi Biernes, Hulio 15.

Bayat ti pannakiinnuman ti media ken ni Governor Ryan Singson, indagadagna ti panagpa-drug test  amin dagiti mayor iti sibubukel a probinsia  ken mangiwayatda iti drug testing kadagiti amin nga empleado iti babaenda.

Segun ken ni Singson, saan a nakapa-drug test dagiti dadduma a mayor agsipud ta adda immuna nga appointmentda.

Immun-una ngem daytoy, nakurang a dua ribu a masuspetsa a drug pushers ken users ti simmuko ken ni Singson idi Hulio 14 a naangay iti provincial capitol quadrangle.

Nagkari dagiti 1,841 a simmuko a suportaranda ti kampania ti gobierno maikontra iti illegal a droga.

Kinuna ni Singson a dina napanunot a kastoy gayamen ti kaadu dagiti drug dependents iti probinsia.

“Kayatna a sawen nga adda panagliway iti kampania iti illegal a droga iti napalabas ket kasapulan ita  iti naing-inet a  kampaniatayo,” kinuna ni Singson.

Ngem segun ken ni Chief Inspector Greg Guerrero, hepe ti Police Community Relations, kaadduanna kadagiti simmuko dagiti drug users a nabayagen a nagsardeng nga agaramat iti droga ngem simmukoda ta nagbutengda a mairamanda.

Kinuna ni Guerrero a bassit laeng ti adda iti drug watchlist iti Ilocos Sur ket adda metten simmuko kadakuada.

Kinunana a kapatpatangda pay laeng dagiti dadduma a nakalista a drug personalities tapno sumukoda metten.

Malaksid laeng iti espiritual a pammagbaga, maikkan dagiti drug suspects iti panagsanay ken livelihood assistance ken rehabilitasion kadagiti nailuod iti droga babaen ti tulong ti TESDA, PNP ken dadduma pay nga ahensia.

Kinarit ni Singson ti liderato ti kapolisan nga ad-adda pay nga ingetanna ti kampania maikontra iti droga idinto nga indagadagna kadagiti simmuko a makitinnulongda tapno matuntonan dagiti polis no sino dagiti agiserserrek, paggapuan ken kasano a maiserrek ti droga (iti probinsia).#