Footer

Banner: Sabali pay a drug personality, napapatay

STO. DOMINGO, Ilocos Sur – Adda kadi metten bihilante a grupo iti Ilocos Sur nga agpatpatay kadagiti masuspetsa a drug pusher?

Limtuad daytoy a saludsod kalpasan a sabali pay a masuspetsa a drug personality ti napapatay iti mismo a sanguanan ti balayna sadiay Barangay Poblacion ditoy nga ili idi bigat ti Hulio 9.

Intaray ti pamilia ti biktima a ni Rey Arman Castro y Tesoro, 37, naasawaan, mekaniko, ken residente iti nadakamat a barangay, iti Tolentino Clinic and Hospital ngem indeklara ti doktor a nangtaming kenkuana a dead on arrival.

Nagsagrap ti biktima iti sugat iti tengnged ken barukong a puon ti nakatayanna.

Kas maibatay iti inisial nga inbetigasion dagiti nagresponde a polis, agtaktakder ni Castro iti sanguanan ti pagtarimaanan  iti motorsiklo a kukuana a naipasdek iti mismo a paraangan ti  balayna  idi maysa a kotse a kolor light green ti simmardeng iti asidegna ket dimsaag ti maysa nga armado a lalaki sana pinaputokan iti sumagmamano a beses ti biktima.

Naglugan met laeng iti kotse ti di nabigbig a suspek sa nagturong ti lugan  iti abagatan a direksion.

Iti panangproseso ti SOCO team ti Ilocos Sur Provincial Crime Laboratory Office iti crime scene, nakarekobreda iti tallo nga empty shells ken maysa nga slug a nagtaud manipud iti cal. 45.

Saan pay nga ammo ti motibo ti pammapatay.

Ngem segun iti polis, nakalista ti biktima kas target drug personality iti daytoy a munisipalidad.

Daytoy ti maikapat a kaso ti pammapatay a masuspetsa a drug personality dagiti biktima.

Idi rabii ti Hunio 28, napal-togan ni Aris Barcena y Viernes, 41, naasawaan, iti sanguanan ti balayda iti Barangay Poblacion.

Kas maibatay iti rekord ti kapolisan, nakasuan ni Barcena iti panaglabsing iti Section 11 ti RA 9165 idi Abril 24, 2014 babaen ti NPS Docket No. I-03-INQ-14h-00146 ken sabali pay a kaso a panaglabsing met laeng iti RA 9165 gapu iti pannakatiliwna bayat ti maysa a pot session idi Disiembre 2, 2014 a naipababaen iti NPS Docket No. I-03-INQ-14L-00207.

Idi Humio 30, napaltogan met ni Mario Molina y Palacpac, aka “Boy”, 59, naasawaan, nego-siante, ken residente iti Barangay Mira, Bantay, Ilocos Sur, iti asideg ti pagpallotan iti asideg ti bisinidad ti Barangay Poblacion ditoy met laeng nga ili.

Segun iti polis-Bantay, adda ni Molina iti babaen ti drug personality watch list.

Kabayatanna, nasukalan a maysan a bangkay ni Nagie Dela Cruz y Angaoan, 31, a napasag ken nadigos iti bukodna a dara iti uneg ti balayna idi agsapa ti Hulio 7.

Kinuna ti kaarrubana a ni Consolacion Cabasal a nakangeg iti nagsasaruno a putok idi agarup 1:30 ti bigat iti dayta a petsa.

Nakasarak ti SOCO iti crime scene iti uppat a naiputok a cartridge cases ti cal. 45, maysa nga slug manipud iti isu met laeng a kalibre ken pad paper a nakaisuratan ti “PUSHER NA” a naikabil iti bukot ti biktima, iti asideg ti ulona.

Maysa kadagiti kari ni Presidente Rodrigo Duterte idi panagkakampania ti panangpu-gipogna kadagiti drug lords ken pushers iti las-ud ti innem a bulan apaman a makatugaw.

Addan naireport a nasurok a sangagasut a drug pushers a napapatay iti nadumaduma nga operasion ti kapolisan maikontra iti droga.#