Footer

PANAGSAGANA KADAGITI BAGYO KEN DIDIGRA

Salaysay ni Eden A. Alviar

NAGBALLAAGEN ti Philippine Atmospheric, Geophysical and Astronomical Services Administration ti panagsagrap tatta ti Pilipinas iti La Niña phenomenon wenno nakaro a matutudo a tiempo kalpasan ti panagsagaba ti pagilian iti El Niño phenomenon wenno napalalo a tikag. Itoy a panawen, saan a maliklikan dagiti napigsa nga angin, layus, panagreggaay dagiti bantay, pannakakurukor ti daga, ken dadduma pay a didigra a pangta iti biag ken sanikua dagiti tattao.

Gagangayen a tinawen laslasaten dagiti adu a bagyo ti Pilipinas nangruna iti Amianan a Luzon ta iti mismo nga abayna iti Pacific Ocean ti pakain-inawan dagiti bagyo. Dua pay laeng a nakapsut a bagyo ti simrek iti Philippine area of responsibility ita a tawen ngem addan dagiti Abagatan a lugar ti pagilian a naglak-am iti layus gapu iti napigsa a tudo. Maibasar iti record ti PAGASA, kadawyan nga agdagup iti 19 – 20 a bagyo dagiti sumsumrek iti pagilian iti tinawen. Kadawyanen a 6 – 9 a bagyo dagiti lumasat iti daga iti tinawen, kaaduan kadagiti bagyo ket lumasat laeng iti baybay.

Iti kaadu dagiti dumalan a bagyo iti pagilian iti tinawen, kasinginen iti panagbiag dagiti Pilipino ti panagsagabada ti rigat ken trahedia iti kastoy a panawen. Daytoy ti gapu a nabukel ti National Disaster Risk Reduction Management Council ken dagiti kaaspingna kadagiti rehion, siudad ken ili tapno mapabassit wenno mapalag-an ti epekto dagiti bagyo ken kalamidad iti intero a Pilipinas.

TI NDRRMC ket ti sigud a National Disaster Coordinating Council, maysa a konseho a buklen dagiti nagduduma nga ahensia ti gobierno pakairamanan ti pannakabagi ti pribado a sektor. Nabukel daytoy babaen ti Republic Act 10121 of 2010 “An Act Strengthening The Philippine Disaster Risk Reduction Management System.”

Idi Pebrero 2010, napagbalin ti sigud nga NDCC ket napagbalin nga NDRRMC, nareorganisar ken napalawa ti masakupanna. Dagiti mangidaulo ti NDRRMC: Chairperson – Secretary of Department of National Defense; Vice Chairperson for Disaster Preparedness – Secretary of Interior and Local Government; Vice Chairperson for Disaster Response – Secretary of Department of Social Welfare and Development; Vice Chairperson for Disaster Prevention and Mitigation – Secretary of the Department of Science and Technology; Vice Chairperson for Disaster Rehabilitation and Recovery – Director-General of the National Economic Development Authority.

Miembro met iti NDRRMC dagiti sekretario ti amin a departamento ken kameng ti gabinete, ken mangidaulo kadagiti nagduduma nga ahensia pakairamanan pay ti Chairman, Commission on Higher Education; Chief of Staff, Armed Forces of the Philippines; Chief, Philippine National Police; Commandant, Philippine Coast Guard; Secretary-General of the Philippine Red Cross; Commissioner of the National Anti-Poverty Commission – Victims of Disasters and Calamities Sector; Chairperson, National Commission on the Role of Filipino Women; Chairman, Housing and Urban Development Coordinating Council; Executive-Director of the Climate Change Office of the Climate Change Commission; President, Government Service Insurance System; President, Social Security System; President, Philippine Health Insurance Corporation; President of the Union of Local Authorities of the Philippines; President of the League of Provinces in the Philippines; President of the League of Municipalities in the Philippines; President of the League of Cities in the Philippines; President of the Liga ng Mga Barangay; Uppat a representative ti Civil Sector Organizations; maysa a representative ti Private Sector, ken Administrator of the Office of Civil Defense

Sagudayen pay ti Republic Act 10121 a dagiti local government unit iti intero a pagilian ket mangbukelda kadagiti lokal nga opisina ti DRRMC iti rehion, probinsia, munisipalidad, siudad ken barangay. Kas pannakaima dagiti LGU, responsibleda iti panagaramid ken panagisayangkat ti Local Disaster Risk Reduction and Management Plan mayataday iti gannuat ti NDRRMC iti benneg ti Disaster Preparedness, Response, Prevention and Mitigation, ken Rehabilitation and Recovery.

Dagiti lokal nga opisina ket addaanda iti Chief DRRM Officer a tulongan dagiti Administrative and Training, Research and Planning, Operations and Warning Officers. Dagitoy nga opisina ket rumbeng nga addaan kadagiti search and rescue and emergency medical services squads ken command-control-and-communications centers. Rumbeng nga addaanda pay kadagiti nasanay a personnel ken kompletoda kadagiti napateg nga alikamen.

Kabayatan ti Aquino Administration, inwayat ti NDRRMC ti ‘Zero Casualty Target’ no tiempo dagiti bagyo babaen ti panagsagsagana ti gobierno ken panangballaag kadagiti umili, ngem saan a nagun-od daytoy a panggep. Nagadu ketdi dagiti natay bayat ti Bagyo Yolanda idi duprakenna ti pagilian idi Nobiembre 2013 nangruna sadiay Eastern Visayas. Nagkamtud dagiti lokal a DRRMC iti panagsagana ken panangballaagda kadagiti masakupanda ta saanda nga impagarup ti kangato dagiti aluyo wenno storm surge a ginubuay ti nakapipigsa a bagyo, ken nakellaat met dagiti biktima ta saanda a ninamnama ti kinadawel ni Bagyo Yolanda.

Iti panagakem ni Presidente Rodrigo Duterte, ken dagiti kabarbaro a mangidaulo ti NDRRMC a da Defense Secretary Delfin Lorenzana, ken OCS Executive Director Ricardo Halad, manamnama a  maipababa wenno mapalag-an ti peggad nga itden dagiti bagyo no agridam ken agtignay amin dagiti maseknan a Disaster Risk Reduction Management Council kadagiti rehion, ili ken siudad.

Ngem uray no kasano ti kinapinget ti NDRRMC ken lokal a DRRMC no dagiti tattao nga agpeggad ket saanda nga ammo ti agkamang iti Dios, ken dida ammo ti dumngeg ken agtungpal iti ballaag ken balakad dagiti agpapaay kadagitoy nga ahensia ti gobierno ket adunto latta dagiti mabiktima kadagiti bagyo ken didigra a sumangbay iti pagilian.#

 

 

Comments are closed.