Footer

SAPATA

SINURSURAN

Kolum ni Jobert M. Pacnis

 

ITAY Hunio 30, pormalen a nagsapata dagiti lidertayo iti puesto a nangatiwanda iti kalleppas a basingkawel. Naan-anayen ti kinaopisialda, ti kinaliderda a mangibagi kadatayo nga umili para iti pagdur-asan ti tunggal maysa. Nakallalagip daytoy a pagteng, saan laeng a kadagiti napili, kangrunaanna kadatayo nga umili. Maminsan pay, adtoyda a baro nga opisial (nupay isu latta met nga isu dagiti dadduma) a mangidaulo kadatayo.

Nadumaduma a wagas ti pannakaannong daytoy a panagsapata dagiti opisialtayo. Iti biang ti presidente, nasurot ti nakaugalian kangrunaan ti panagsapata a nakapatay ti dakulap iti Nasantuan a Surat. Kasta man met laengen ti bise presidente. Ngem ti kangrunaan a malagip ditoy ket ti panagsapatana iti sanguanan ti maysa laeng a kapitan— kapitan ti kakurapayan a barangay iti distritona idi maysa pay laeng a kongresista.

Ngem ania man ti wagas a pannakaiwayat ti panagsapata iti sanguanan dagiti umili, maysa a napateg a pagteng iti pakasaritaan daytoy. Saan a barengbareng ti panagsapata. Wenno panagkari iti sanguanantayo a nagtalek kadakuada. Nasagraduan a banag, mabalin pay a kunaen.

Adda di maimatangan a bileg a mamagraip kadatayo nga umili ken kadagiti lider. Dayta ti mangitunda iti tunggal maysa ti kinapateg ti akem iti panagdur-as ti paggargarawantayo.

Ket nasayaat la unay no amin dagitoy a nagsapata, aramidenda a sipupuso dagiti naipakumit a pagrebbenganda. Laglagipenda koma a dakkel nga utang a naimbag a nakemda kadatayo ti pannakaipaay kadakuada ti bileg. Agserbida koma ngarud a sipupuso.

Arapaaptayo nga umili ti kaadda koma ti panagkaykaysa dagiti lidertayo tapno mapataray a nasayaat ti rienda ti gobierno ket maipaay met laeng ti serbisio nga awan ti mailanglangi. Nagsayaat a kitkitaen no adda panagtutunos (para iti pagimbagan) dagiti opisialtayo. Saan a pagdanagan dagiti dakes nga aramid ta ti akemda ti kanayon nga um-umkis iti barukongda.

Ngem ti rigatna laeng, saan met latta a mailaksid ti kaadda dagiti opisial, kas pangarigan kadagiti il-ili, a di agkakatunosan. Adda dagiti personal a banag a didanto malipatan a puon ti panagimbubukod ti tunggal maysa. Adda dagiti sugat a naukrit iti kallabes a basingkawel nga agnunnunog iti kaungganda.

Kas iti maysa nga ili iti Tanap. Maitugotan, uray ganggannaetka kadayta a disso, nga awan ti panagmaymaysa dagiti nabotosan nga opisial. Makuna pay ketdi nga adda saksakiten ti nakem ti tunggal maysa. Ken panagimbubukod pay ketdi.

Iti napasamak nga otteyking wenno panagsapata dagiti kappili nga opisial, kas kuna dagiti agindeg a nakasaksi, iti sanguanan dagiti nakautanganda iti bileg, uppat laeng dagiti dimmar-ay— ti mayor ken ti bisena ken dua laeng a konsehal. Awan dagiti dadduma!

Naimbag laeng no adda balido a rason ti kaawanda kadagiti mangnamnama a kailianda a maimatangan koma met ti panagsapatada a pangibinggasanda ti gagemda nga agserbi a sipupudno, awanan panaginkukuna, ken managbuteng iti Dios. Ken panawen nga agyamanda, makisinninggalut iti rikna, gagem, ken arapaap kadagiti iturayanda.

Ngem anian ti rason a lumlumtaw! Kasla kayatda a boykoten (ta majority-da met ti konseho) ti nangabak a mayor ken bise. Kasano, ti amoda a katiketda a para mayor, naabak met! Ket saanda a pulos a maaklon!

(Adda tuloyna)

Comments are closed.