Footer

2 drug personality, ginudas masuspetsa a bihilante a grupo

STA. LUCIA, Ilocos Sur – Dua pay a drug personality ti nagudas iti nagsina a pammaltog a napasamak iti Sta. Maria ken ditoy nga ili a masuspetsa nga inwayat ti bihilante a grupo.

Idi agarup 8:28 ti rabii ti Hulio 19, inreport ni Suagayan Barangay Captain Reynaldo Hadoc iti polis nga adda napasamak a pammaltog iti kalsada a sakup ti barangayda.

Nadatngan dagiti nagresponde a polis a nakadalutayray iti  kalsada iti abay ti Honda Wave motorcycle ti biktima  nga idi agangay ket nabigbig a ni Eduardo Galigaro y Alcantara, aka “Dugal”, 28, residente iti Barangay Parioc 2nd, Candon City.

Nagsagrap ni Galigaro kadagiti sugat iti ulo ken bagina ket nupay naitaray iti Sta. Lucia District Hospital, naideklara nga awanen ti biagna.

Nakarekobre ti SOCO team iti lima a kapsula manipud iti cal. 45, sumagmamano a plastic sachet ken aluminum foil a nagkarga iti masuspetsa a shabu residue ken  paper board a nakailanadan ti:  “Wag nyo akong tularan drug pusher adik ako” a naikabil iti abay ti biktima.

Segun iti polis-Candon, adda ti biktima iti watch list dagiti drug personalities iti siudad.

Iti pannakaisurat daytoy, di pay ammo no asino ti nanggudas ken ni Galigaro.

Sakbay daytoy, pinaltogan idi rabii ti Hulio 17 ti di pay nabigbig a suspek da John Paul Camangeg y Cañas, 37, fish vendor, ken John Cedric Camangeg y Asprec, 18, baro, college student, agpada a  residente iti Brgy. Poblacion Sur, Sta. Maria, Ilocos Sur .

Kas maibasar iti inbestigasion, agbuybuya dagiti biktima agraman dagiti pamiliada iti telebision iti uneg ti balayda idi simrek ti armado a lalaki a nagaruat iti ballcap, puraw a tisirt, camouflage short pants, ken naka-shades sana pinaltogan iti sumagmamano a beses ni John Paul.

Dagus a natay ni John Paul gapu iti sinagrapna a sugat iti ulona.

Kinamat ni John Cedric ti suspek ket pinaltogan ti suspek a nagsagrapanna iti sugat iti bukotna.

Immuna a naitaray ni John Cedric iti Sto. Niño Hospital  sa naiyalis iti Gabriela Silang General Hospital.

Iti kaudian a report, nalasatanen ni John Cedric ti peggad.

Naglugan ti suspek iti maysa kadagiti dua a motorsiklo a nagluganan ti tallo a kumplotna sada naglibas iti amianan a direksion.

Nangipatulod ti polis-Sta. Maria iti flash alarm kadagiti kabangibangda a police stations ngem negatibo ti resultana.

Nakasarak ti SOCO team manipud Candon City iti uppat a kapsula manipud iti M16 iti uneg ti balay dagiti biktima.

Segun iti polis-Sta. Maria, nakalista ni John Paul a drug pusher/user ken boluntario a simmuko idi Hulio 13.#

 

Comments are closed.