Footer

BANNER NEWS: Most wanted drug personality, nagudas iti pannakipinnaltogda kadagiti polis

CABUGAO, Ilocos Sur – Nagudas ti maysa a wanted drug personality ken lider ti armado a grupo a gun for hire bayat ti pannakipinnaltogda kadagiti operatiba sadiay Sitio Padual, Barangay Pug-os ditoy nga ili idi agsapa ti Hulio 19.

Nabigbig ti nagudas a wanted drug personality a ni Roger Sinco y Mar, 39, nabatbati a lider ti armado a grupo a matangtangdanan a pumatay ken agiwaywayat iti panaglakuan iti illegal a droga/

Nakalista iti Sibat Priority Target Regional Level, Wanted List Drug Personalities ken tardiet ti Coplan Gold Fish, addaan ni Sinco iti lima a warrants of arrest gapu iti panaglabsingna iti  Section 28 ti RA 10591 a nai-docket iti babaen ti Criminal Case No.  3366-KS; panagsalungasing iti  Sec. 12, Art. II ti RA 9165 a nai-docket iti babaen ti  CC No. 3367-KS;  direct assault upon agents of a person in authority a nagaramat iti kolorum a paltog a nai-docket iti babaen ti CC No. 3368-KS; panaglabsing iti Sec. 11 Art. II ti RA 9165 a nai-docket iti babaen ti CC No. 3369 nga inyisio amin ni Judge Nida B. Alejandro ti RTC Branch 24, Cabugao, I. Sur; ken murder a nai-docket iti babaen ti CC number 3519-C nga inyisio ni Judge Policarpio P. Martinez ti First Judicial Region, RTC Branch 71, Candon City.

Nakalibas dagiti kakadua ni Sinco a nabigbig a da Harry Savellano y Garma, alias “Bobby”; Elyrey Agustin alias “Nano”; Eric Savellano ken Edgar Basuil, residenteda amin iti  Barangay Pug-os, Cabugao, Ilocos  Sur.

Kas maibatay iti report, kabayatan ti panangiyimplementar ti nagtitipon a kapolisan a pakaibilangan ti  Cabugao Municipal Police Station, ISPIB, ISPPSC, 1st Maneuver Coy RPSB1, RID PRO1, RIU1, Highway Patrol Group ISUR, CIDG ISUR, ISPAIDSOTG, PDEA ISSET1, ISPIDMB, 103rd Maritime Group, San Juan Municipal Police Station ken Sinait Municipal Police Station ti iggemda a search warrant ken warrants of arrest maikontra ken ni Sinco, nasiputan ida ti grupo ti suspek ket ginandatda ti naglibasda a nakalugan iti nangisit a Suzuki Skydrive, awanan plate number ken asul a Honda TMX 155 tricycle, awanan plate number.

Ngem nakaipasdek ti barikada dagiti polis iti likudan ti balay a nagresulta iti pannakipinnaltog dagiti suspek kadagiti  polis.

Idi malipitda dagiti suspek, pinanawanda dagiti motorsikloda sada nagtataray nga immadayo.

Ngem sabali manen a grupo ti mangur-uray kadakuada iti naturongda a katurodan ket ditoy a napasamak ti sabali manen a panagpipinnaltogda.

Kalpasan ti ranget, nasarakan ni Sinco a daradara gapu iti sugatna iti kapagayan. Ngem nakalibas dagiti kakaduana. Iti pannakaisurat daytoy, madama a birbiroken dagiti polis dagiti suspek.

Naitaray ni Sinco iti maysa nga ospital iti Cabugao ngem indeklara ti doktor a nangtaming kenkuana a dead on arrival.

Iti panangproseso ti SOCO manipud iti PNP Crime Laboratory a nakabase iti Ilocos Sur Provincial Police Office iti crime scenes, nakarekobreda kadagiti sumaganad: iti umuna a ranget, uppat a fired cartridges;

Iti maikadua a ranget, maysa Remington  Remington Cal .45 nga addaan iti  magasin a nagkarga iti 3 a bala; maysa nga sling bag a nagkarga iti maysa a medium size heat sealed plastic sachet a nagkarga iti mapapati a shabu; maysa a short magazine para cal .45; maysa nga improvised straw scope; improvised lighter; ken maysa a Samsung S4 cellular phone;

Iti maikatlo a ranget, maysa a black sun glass pouch a nagkarga iti 2 heat sealed  plastic sachet a nagkarga iti mapapati a shabu;  plastic tooter;  cal .45 Taurus nga addaan magasin a nagkarga iti 6 bala;  Guess watch pouch a nagkarga iti  improvised glass tooter;  7 fired cartridge cases para cal .45; 4 fired cartridge cases para cal 5.56mm ken heat sealed plastic sachet a nagkarga iti mapapati a shabu a narekobre manipud iti  camouflage short pants iti uneg ti back pack.

Nakakumpiska met dagiti polis iti balay ni Sinco iti  maysa a medium size heat sealed plastic sachet a nagkarga iti mapapati a shabu; weighing scale, maysa a pakete ti awan naggianna a plastic sachet; maysa a  homemade cal .38 nga addaan 5 bala iti uneg ti  cylinder ken  9 bala para cal .45 pistol.#