Footer

Deboto

Imbiit ni Jobert M. Pacnis

 

ADUN ti tao a nadanonak iti simbaan nupay agalas dose pay laeng iti aldaw. Namnamsek iti uneg. Mangrugi metten a mapunno ti ridaw ti simbaan. Kadagiti sirok ti kayo iti aglawlaw ken sango, addadan managsaggaysa a nakapuesto dita.

Kadawyanen daytoy a buya tunggal Biernes Santo. No palausen ti manarita, awan mabati a kameng ti pamilia iti maysa a pagtaengan. Kayatda a subboten ti dida pannakakaskastrek iti simbaan gapu kadagiti adu a trabaho. A di maitutop a rason—ta rumbeng laeng nga ipaay iti Apo ti maysa nga aldaw tunggal lawas para Kenkuana.

Kalpasan a nakaugisak iti pagbenditaan, tinurongko ti mini-gym iti abay ti kampanario iti kanawan-a-sango. Nangalaak iti maysa a monoblock ket daytoy ti nagtugawak. Diak kayat iti uneg ta napudot.

Nagplastarak iti suli. Nalawag latta a mangngeg ditoy ti pannakailawlawag dagiti Maudi a Pito a Balikas ni Kristo gapu iti tallo nga ispiker a naimuntar iti tuktok ti simbaan a nakasango iti kalsada.

Nalawag a makitak dagiti sumrek iti gate. Ken kasta metten dagiti agruar-sumrek, ta nalabit pudotenda, iti ridaw ti simbaan.

Talaga a kalgawen. Umarakup ti dagaang. Saan a kabaelan dagiti muymuyong iti aglawlaw a palamiisen ti ikaykayabna nga angin.

Ngem saan ketdi a rason daytoy tapno di mapusek ti simbaan. Napaisemak kadaytoy. Kasla ketdin sa la ammo dagiti pada a deboto ti ridaw ti simbaan no kastoy nga okasion.

Madaman a mailawlawag ti Natungpalen, ti maikanem a balikas, idi kellaat a nanglangeb. Medio nabuak dagiti adda kadagiti kaykayo. Immayda nangkita iti puestoda iti yanko.

Ngem di namki dagiti dadduma. Awan dayta, ilabasna laeng, kasla kunkunada.

“Ibagayna ti adda iti Biblia,” kinuna ti maysa kadagiti lallaki— a nailasinko, maysa kadagiti konsehal ti ili.

Nalagipko ti naynay nga adawen iti Biblia nga isermon ni Apo Padi no kasta nga ipalawagna ti maudi kadagiti pito a balikas:

Idi ngannganin agalas tres iti malem, kellaat a nagsip-nget ti aglawlaw…

Nagkakatawa ti bunggoyda. Diak ammo no ania ti nakakatkatawa iti imbaga ti konsehal. Napangilangilak laengen.

Ket idi madanonen ti batang ni Apo Padi, intarakataknan. Nagkakaribuso dagiti tao. Maysan-maysa ti naglinong. Aglilinnetletkamin ditoy mini-gym. Ken uray iti sango ti simbaan.

Ngem apagbiit laeng ti tarakatakna. Nadepdep met ketdi ti tapok ta pinagayusna bassit. Husto a malpas ni Apo Padi ti batangna.

Timmakderak ket nagtu-rongak iti ridaw ti simbaan tapno mapan umagep iti Natay a Kristo. Ngem kellaat a maysa nga ubing a lalaki ti nagtaray iti sanguanak. Napayatanna ti sapatos ti pamalkaten a babai  a sarsarunuek.

“Shit!” kinuna ti babai. Dagadagan ti makanigid a sapatosna.

Iti itataliawna, nalasinko a ti gayam asawa ti pasado a bise-mayor. Nga iti kallabes, indauluanna ti grupo dagiti WOPIC iti simbaan. Agbibitin iti nakaakkub a dakulapna ti maysa a rosario.

Tinengngelna ti ubing. “Dim’ la kitkitaen ti pagnaam!” inkilgana. Iti diak ninamnama, inyablatna ti iggemna a rosario.

Kimmawiwit iti rupa ti ubing ti rosario, ket idi gursoten ti babai ti kuentas, nagsat daytoy ket naregreg ti sumagmamano a binukelna iti pitakpitaken a basar ti simbaan, ti kuros daytoy nagkalangiking a nagballatek iti datar sa nagdisso— immagep— iti sungo ti dagadaga a sapatos ti babai.#

Comments are closed.