Footer

EDITORIAL: Ti Pannakawayawaya ni Gloria Macapagal-Arroyo

NAWAYAWAYAANEN ni sigud a Presidente ken agdama a Pampanga Representative Gloria Macapagal Arroyo kalpasan ti uppat a tawen a pannaka-hospital arrest-na sadiay Veterans Memorial Medical Center. Inabsuelton ti  Korte Suprema ti kaso ni GMA a plunder gapu iti kinakurang ti ebidensia.

Impila ni Ombudsman Conchita Carpio Morales ti kaso idi Hulio 13, 2012 gapu iti mapapati nga illegal a pannakagasto ti P366 million Intelligence Fund ti Philippine Charity Sweepstakes Office iti las-ud ti tallo a tawen manipud 2008 – 2010 idi presidente pay ni GMA.

Adu pay dagiti dadduma a kaso a naipila kontra kenkuana kalpasan ti terminona a presidente gapu ta awananen iti immunity from suit. Lima pay a kaso ti plunder ti naipila kontra ken GMA ngem amin dagitoy ket naibasura gapu met laeng ti kinakirang ti ebidensia. Naidarum pay ni GMA iti kaso nga electoral sabotage gapu ti mapapati a pannakikumplotna iti panagsuitik iti national election iti daydi Maguindanao Governor Andal Ampatuan Sr. ken Election Supervisor Lintang Bedol, ngem nakapagpiansa idin isuna para iti temporario a wayawayana.

Nagduduma ti reaksion dagiti umili iti pannakawayawaya ni GMA kalpasan nga inyetnag ti Korte Suprema ti pangngeddeng a nangabsuelto kenkuana. Adda dagiti naragsakan gapu ta maas-asianda iti kasasaad ti salun-at ti sigud a presidente nangruna kadagiti a mamati nga inosente isuna kadagiti kaso a nakaidarumanna.

Maysa kadagiti makasuron iti pannakaabsuelto ni GMA ket ni sigud a Presidente Benigno Aquino III a kabayatan ti administrasionna ket inkagumaanda a maidarum ken maikulong ti sinarunona a presidente. Nagbalin pay ni GMA a laddet ken rason kadagiti adu a problema a sinango ti Aquino Administration. Nagtalinaed pay idi ni Aquino a tuleng iti kiddaw a palubosanda ni GMA a mapan agpaagas sadiay ballasiw-taaw gapu iti sagsagabaenna a sakit iti tengngedna.

Mairaman kadagiti makasuron iti pannakaabsuelto ni GMA ket da Ombudsman Morales ken Senator Leila De Lima a sigud a Secretary of Justice a napinget a nagimbestigar ken nangpatibker ti kaso kontra iti sigud a presidente. Agapila man ti Office of the Ombudsman iti Korte Suprema, ngem iti kadagupan dagiti 11 a pimmabor kontra kadagiti uppat a saan a kimmanunong iti desision ket narigaten nga agbaliw ti pangngeddengda.

Para kadagiti napeklan a loyalista ni Aquino, dakkel a tubeng ti pannakaabsuelto ni GMA iti kampania ti gobierno kontra ti kurapsion ken kunniber iti pagilian gapu ta maibilang ti sigud a presidente a kangatuan a nakasuan ken nakulong iti agdama a panawen gapu iti kaso a plunder a saan a mabalin a mapiansaan. Mamatida a kalpasan ken GMA ket mabalin a sumaruno a makapagpiansa wenno maabsueltonto pay dagiti dua a nakakulong a sigud a senador a da  Jinggoy Estrada ken Ramon Revilla Jr.  Pinalubosan ti Korte Suprema a makapagpiansa ni sigud a Sen. Juan Ponce Enrile gapu iti humanitarian consideration gapu iti kinalakaynan. Nakulong dagiti tallo a sigud a senador gapu ti pannakainaigda iti P10 billion pork barrel scam.

Masmasdaaw dagiti adu nga umili ta awan pay makabulan kalpasan ti panagsukat ti administrasion ket inabsuelton ti Korte Suprema ni GMA. Nairanrana laeng ngata daytoy wenno nagbudeng a nangiyetnag ti Korte Suprema ti desision-na idi ni Aquino pay ti presidente? Nairanta met ngata a naiparuar ti desision iti termino ni Presidente Rodrigo Duterte ta uray idi mayor pay laeng, kas sigud a prosecutor ket mamati a nakurang ti ebidensia kontra ken ni GMA? Saan a mailibak nga iti agdama a Duterte Administration ket adda dagiti kameng ti gabinete a nagserbi ken nasinged ken GMA.

Ti pannakawayawaya ni GMA ket ipaduyakyakna ti saan a patas a pannakaipakat ti hustisia iti pagilian. Nadaras ti pannagna dagiti kaso dagiti adda nabileg a kapetna, ngem naginad ken malungsot met iti pagbaludan dagiti awanan-gaway nga akusado wenno kombiktado. (Eden A. Alviar)

 

Comments are closed.