Footer

Kalpasan isusukoda, 2 drug pusher, natiliw iti drug operation

SINAIT, Ilocos Sur – Makalawas laeng kalpasan ti isusukoda ken panangikarida a saandan a sublian ti illegal nga aktibidadda, dua a lalaki ti inaresto ti kapolisan iti nagsina a drug operation nga inwayatda Candon City ken ditoy nga ili idi Hulio 17 ken 18.

Sadiay Barangay Allangigan, Candon City, idi agarup 10:30 ti rabii ti Hulio 17, inaresto dagiti polis-Candon City ni Samuel Del Rosario y Valdez, 39, naasawaan, karpintero ken residente iti Barangay Patac, Galimuyod, Ilocos Sur  kalpasan a nagpositibo ti buy-bust operation nga inwayatda maikontra iti suspek.

Malaksid ti bassit a heat sealed plastic sachet a naglaon iti mapapati a shabu ken P1,000.00 a marked money a  naaramat iti transaksion, nakasamsam pay dagiti polis iti ikut ti suspek iti maysa a dakkel a heat sealed plastic sachet a naglaon iti mapapati a shabu, 2 a folded aluminum foils a mapapati nga addaan shabu residue ken NOKIA cellular phone.

Segun iti polis, karaman ni Del Rosario iti drug watch list ti Galimuyod municipal police station ken boluntario a simmuko iti daytoy nga estasion idi Hulio 11 a nagpirmaanna iti apidabit a saannanton a sublian ti illegal nga aramidna.

Kabayatanna, babaen ti bileg ti search warrant nga inyisio ni Judge Marita Balloguing ti RTC Branch 20, Vigan City, nakasamsam iti droga ti nagtitipon nga elemento ti Sinait MPS, ISPAIDSOTG, ISPIB ken ISCIDG iti balay ni Robert Agbayani y Verbo, 36, awanan asawa, mannalon, sadiay Barangay Ricudo, Sinait, Ilocos Sur idi agarup 6:00 ti bigat ti Hulio 18.

Adda iti watch list iti municipal level ni Agbayani ken simmuko a drug personality.

Ngem kinuna ti polis nga iti baet ti isusukona, namonitorda ken napatalgedanda nga aktibo pay laeng ti suspek iti illegal nga aktibidad ti droga.#

 

Comments are closed.