Footer

SAPATA

SINURSURAN: Kolum ni Jobert M. Pacnis

(Tuloyna)

 

Sugat iti eleksion. Pudno a nasaem kadagiti naakikid ti panagpampanunotna. No kasta lattan, pagturongan ngarud ti ili nga iturayanda? Asino ti agsagaba? Saanda ngata a mapanunot a kababain dayta nga impakitada?

Ket anian a pannakalpay ti abaga dagiti dimmar-ay kadayta a panagsapata. Saanda la koma kanon a dimmardar-ay aglalo ket nagtaudda pay kadagiti adayo a bario ket kinasapulanda ti nagdammang iti karayan ken sabangan. Arig impustada pay ti karadkadda ayatda laeng a maimatangan koma met dagiti naisem a baro a liderda.

Iti panagriknada, dimmadakkel ken rimmungsot dagiti allon idi daliasatenda ti sabangan iti panagawidda.

Dagiti kakastoy nga opisial ti di koma rumbeng a nangabak, kinunkunada. Awan ti sportsmanship-da. Naabak laeng ti amoda, rimmuaren ti pudno a garit/marisda!

Ania pay ngarud, napangilangilda laengen ta imbutosda ngarud ida. Yurayda laengen ti sumaruno a basingkawel a pangikur-itanda iti im-impenda a riknada bareng saanto nga abbengan dagiti nagtapaya a maipapetpet dagiti pilienda.

No nalpas koma metten ti eleksion, maitutop koma aleng a rugianen nga aramiden dagiti addang a mamaglunit kadagiti sugat. Saan a pagnunogen dagitoy. Ta datayo nga umili ti ad-adda nga agrigat iti kastoy nga awan panagkaykaysa dagiti lidertayo.

Kadagiti maseknan iti nasao nga ili, saanda ngata nga ammo a tunggal salisal, adda mangabak ken maabak? Wenno karamanda kadagiti mamatpati nga iti eleksion, awan ti makuna a naabak no di ket nasaur? Kasano ngarud a makapaguyas ti iturayan wenno dagiti umili no kasta?

Laglagipen koma dagitoy nga opisial a saan a maymaysa ti aldaw. No agtultuloy ti kasta nga aw-awidda, sigurado la ketdi saanto idan a yikkis dagiti botante. Baka ditan nga agngudo ti makuna a career-da— ta kasta metten ti panangipapan ti kaaduan iti politika.

Saan ngarud a mapabasol ita dagiti nasao nga opisial dagiti umili no ngilngilangilanda ken adu saoaao iti liklikudanda.

Kas pangarigan:

“Duldogda! Awan ammoda!”

“Saanda la ketdi nga agserbi dagita no di ket agaw-awat laeng ti sueldo ti aramidenda. Kasano, dida met nagsapata! Pampandagandan, a, dayta awan ti inkarkarida iti sanguanantayo nga umili! Lunga’danto pay laeng!”

“Dida pay la ngarud agrayuma amin tapno didan makapagna ta isunto met laeng nga isu!”

Wen, nasasakit unay dagitoy a sasao. Ngem ania ngarud ket inyun-una met dagiti maseknan. Simple laeng a pannakisango ken panagyaman kadagiti umili , dida pay maaramid. Daytanto la ketdin mangannong iti akemda nga agserbi kadagiti iturayanda?

Saan pay met ketdi a naladaw tapno mariing dagiti nasao nga opisial iti pannakailibayda. Karugrugi pay laeng no ar-arigen ti panagtakemda. Adda amin kadakuada ti panawen. Ipamatmatda koma a nagbiddutda iti panamagtalinaedda iti sakit ti nakem ti pannakaabak ti kaduada. Agtrabahoda ketdi iti pagimbagan ti tunggal maysa. Ipakitada ti pannakikayammetda iti agdama nga uloda tapno naan-annayas met laeng ti panagtaray dagiti proyekto.

Kadagiti agindeg iti nasao nga ili, saan koma a ditoy ti pagnguduan met ti pannakibadangda iti administrasion. Ad-adda ketdi nga ipamatmatda ti kinamagtulongda tapno mapatibker dagiti lider a mangipaay iti namnamaenda a serbisio.

Nasayaat la unay no pagsarmingan ti kinuna ti maysa a nagbalin a presidente ti Amerika: Saanmo a damagen no ania ti maipaay ti pagiliam kenka; damagem ketdi no ania ti maipaaymo kenkuana.

Datayo koma ketdi nga umili ti agsapata iti ilitayo, iti pagiliantayo. Babassit man dagitoy nga aramid, no pagtitiponentayo, saan a di dakkel ti maibuntokna a pagsayaatan ti tunggal maysa kadatayo.

Aglalo no isapatatayo koma a gesdantayon dayta maiparit nga agas ken ti nagdakes a pammarpardaya nga ugalitayo. Nagsayaat koman ti biag ken agbiag!#