Footer

PNP – SAF kas guardia sadiay NBP.

ADDA kadi sabali pay a mision ti Philippine National Police Special Action Force iti panangsukatda kadagiti prison guard nga agbantay kadagiti balud sadiay New Bilibid Prisons? Apay koma a dagiti kameng ti elite force ti PNP a nasanay iti counter-terrorism ti maibaon nga agbantay kadagiti balud?

Daytoy ti saludsod dagiti umili kalpasan nga indauloan ni PNP Chief Dir. Gen. Ronald De La Rosa dagiti 320 nga elemento ti SAF iti umuna nga aldaw a panagguardiada iti maximum security compound ti NBP.

Impakaammo ni Justice Secretary Vitaliano Aguirre a temporario a sukatan dagiti PNP SAF dagiti Bureau of Corrections guard kabayatan ti idadalanda iti re-education ken re-training gapu kadagiti irregularidad a napasamak iti NBP. Impakaammona pay a kalpasan ti dua a bulan ket sumukatto met dagiti kameng ti Philippine Marines nga agbantay iti NBP.

Naibaon nga agdalan iti re-education dagiti NBP guard gapu kadagiti kontrobersia a nakakainaiganda kas dagiti nasamsam nga adu a kontrabando ken maiparparit nga alikamen ken illegal a droga ket makastrek iti uneg ti pagbaludan gapu ti pannakikumplot dagiti opisial ken guardia. Mapapati pay a dagiti nakabalud a convicted drug lord ket maitultuloyda ti panangpatarayda kadagiti negosioda iti illegal a droga babaen ti panagusar kadagiti cell phone ken internet ket mamandarda dagiti pasurotda iti ruar ti pagbaludan. Naipadamag pay a dagiti nakabalud a drug lord ti nangpondo ti plano a pannakapapatay kada Presidente Rodrigo Duterte ken Dela Rosa gapu ti nainget a kampaniada kontra ti illegal a droga.

Nagsukimat dagiti PNP SAF kadagiti selda iti Building 14 nga ayan dagiti prominente a balud ket nakasamsamda kadagiti mobile signal booster, telebision ken P200,000.00 cash. Kinompronta met ni Dela Rosa dagiti prominente a balud ken drug lord a da Peter Co, Herbert Colangco ken Jaybee De Guzman. Da Co ken Colangco ket kapada ni Peter Lim nga innaganan ni Duterte a tallo a kangrunaan wenno level 5 a drug lord iti Pilipinas. Naikappeng ni Co iti Chinese syndicate a Triad. Kameng met ni Colangco iti Kuratong Baleleng.

Naibaon ti PNP SAF nga agbantay iti NBP kas paset ti kampania ti gobierno kontra illegal a droga ken tapno mapasardeng dagiti illegal a mapaspasamak iti pagbaludan gapu ta mararaemda kas elite unit ken manamnama a saandanto a pulos a mapasuksokan wenno makikumplot kadagiti kriminal. Adda dagiti mamati a naibaon dagiti PNP SAF iti NBP tapno naan-anayen a maparalisado ti operasion dagiti nakabalud a drug lord nangruna dagiti innaganan ti Presidente.

Napaneknekanen ti kabaelan ti PNP SAF a nangparmek kadagiti napagbutbutngan a balud a lider ti Abu Sayyaf Group a nakulong sadiay Metro Manila Rehabilitation Center ti Bureau of Jail Management and Penology, Camp Bagong Diwa, Taguig City idi Marso 15, 2005.  Napapatay dagiti nagtipon a puersa ti PNP SAF ken Special Weapons and Tactics dagiti terorista a nangkubkob ti pagbaludan pakairamanan da Ghalib Andang alias Commander Robot, Alhamser Limbong alias Commander Kosovo, Nadzmi Sabdullah alias Commander Global, ken Sadit Abdul Ganit Husim alias Commander Lando. Nabigbig dayta a gapuanan ti PNP SAF a napartak a pannakaresolbar ti krisis.  Inakusaran idi dagiti human rights group dagiti SAF iti police brutality nga inrantada a patayen dagiti terorista, ngem pinaglibakan dayta ti PNP.

Iti baro nga akem ita ti PNP  SAF ket aglatak manen daytoy nga elite unit a nagbalin a sentro ti imatang ti publiko gapu iti napasamak a pannakapapatay dagiti 44 a SAF commando, ken pannakasugat dagiti 12 nga operatiba sadiay Mamasapano, Maguindanao idi Enero 25, 2015 kabayatan ti Operation Exodus iti pannakirangetda kadagiti kameng ti Moro Islamic Liberation Front ken Bangsamoro Islamic Freedom Fighters kalpasan ti pannakapapatayda iti wanted nga international a Malaysian a terorista a ni Zulkipli Bin Hir alias Marwan.

Saanen a mabilang dagiti nalimed a gapuanan ti SAF iti pagilian manipud pay idi nabukel daytoy a puersa. Ania kadi ti SAF a pagkarkarit ti PNP?

TI SAF ket isu ti National Mobile Unit ti PNP a binukel ni Maj. Gen. Fidel V. Ramos idi Mayo 16, 1983 idi isuna pay laeng ti Hepe ti nawaran a Philippines Constabulary. Nabukel ti SAF nga umasping iti British Army Special Air Service. Dagiti immuna a nangidaulo ti SAF ket da Ramos ken dagiti sigud a nagbalin a heneral a da Renato de Villa, Rosendo Ferrer ken Avelino Razon.

Nagsanay  dagiti umuna a kameng iti SAF Ranger Course a buklen dagiti 149 nga operatiba pakairaman dagiti 26 a commissioned officer ken dagiti dadduman ket enlisted personnel manipud kadagiti nagduduma a unit ti Constabulary kas  ti PC Brigade,  Long Range Patrol Battalion, K-9 Support Company, Special Organized Group, Light Reaction Unit ti Metrocom, Constabulary Off-shore Action Command ken dadduma pay. Idi agbayag, nasukatan ti nagan ti kurso a SAF Commando Course.

Idi damo, nairanta ti SAF iti pannakiranget kadagiti rebelde a komunista ken Moro National Liberation Front idi Dekada 80. Nangrugi a naglatak ti SAF kabayatan ti February 22 – 25, 1986 EDSA People Power Revolution ta isuda ti nagsamakedan ti grupo ni General Fidel Ramos a nagbantay iti Camp Crame kabayatan ti rebolusion a nangpatakias ken ni Presidente Ferdinand Marcos iti turay ken nangisaad ken ni Corazon Aquino kas Pangulo ti pagilian. Kabayatan ti lima nga aldaw a rebolusion, indauloan idi ni Lt. Col. Reynaldo Velasco ti SAF a nangdepender ti Camp Crame a nagkutaan idi da Ramos, Defense Minister Juan Ponce Enrile ken dagiti rebelde a soldado. Nangiwayat pay ti SAF kadagiti special operations kontra kadagiti loyalista a puersa.

Kabayatan ti termino ni Pres. Corazon Aquino, ti SAF ti maysa a nangted ti tibker ti gobiernona nangruna sadiay Metro Manila gapu ti pangta dagiti nagsasaruno a kudeta. Malaksid kadagiti naglatak nga akem ti SAF, aktiboda a nalimed iti pannakaparmek dagiti terorista, rebelde ken organisado a grupo dagiti kriminal wenno sindikato, ken kadawyan a kriminal.

Idi Enero 29, 1991, pinirmaan ni Presidente Aquino ti Republic Act 6975 a namagbalin ti PC SAF a PNP SAF idi napagbalinen ti nawara a PC kas PNP. Naglatak pay ti PNP SAF gapu ti panagbantayda kadagiti high-profile detainee sadiay Fort Santo Domingo, Santa Rosa, Laguna pakaibilangan idi da sigud a Pres. Joseph Estrada, Moro National Liberation Front Chairman Nur Misuari, ken Janet Lim Napoles.

Iti agdama, dagiti trainee iti PNP SAF ket agsanayda sadiay Fort Santo Domingo, Laguna ket agdalanda iti nainget nga special military combat training kas ti explosives and ordinance disposal, basic airborne course, urban counter revolutionary warfare, basic underwater search and rescue operations course ken unconventional warfare.

Nagbalin ti PNP SAF a kangrunaan a police anti-terrorist unit ken maysa kadagiti responsible iti counter-terrorism iti intero a pagilian.  Gapu ti nainget a training ken dagiti kabaroanan nga alikamenda, manamnama a kabaelanda a paksiaten dagiti gannuat dagiti sindikato ken napeklan a kriminal pakairamanan dagiti adda pakainaiganna iti illegal a droga a nakakulong iti nailian a pagbaludan sadiay Muntinlupa.#