Footer

‘Aldaw ti Propesional’ naangay iti Ilocos Sur

VIGAN CITY – Tapno maiyasideg ti serbisiona kadagiti tattao, nangisayangkat ti Professional Regulation Commission (PRC)-Baguio Regional Office iti ‘Aldaw ti Propesional’ iti Ilocos Sur idi Enero 14.

Itoy nga aldaw, naiwayat ti inisial a rehistrasion dagiti kabarbaro a nakapasa a nurses iti November 2016 Board Licensure Examination for Nurses (BLEN) manipud iti alas otso ti bigat agingga iti alas kuatro ti malem iti conference room ti provincial capitol a masarakan ditoy a siudad.

Naiwayat ti rehistrasion iti first come, first served basis ken awan ti alphabetical queuing.

Karaman kadagiti serbisio nga indanon ti PRC kadagiti klienteda ti inisial a pannakailista dagiti pimmasa kadagiti nadumaduma nga eksamen; pannakapabaro ti lisensia; panagawat kadagiti aplikasion para kadagiti masungad nga eksamen; pannakaited kadagiti lisensia, sertipiko ti rehistrasion, sertipikasion iti good standing ken sertipiko ti pannakaruar ken rating para iti Nursing Licensure Exam, Licensure Examination for Teachers ken Criminologists.

Kagiddan a naangay iti daytoy met laeng nga aldaw ti ‘Aldaw ti Propesional’ iti municipal hall ti Baler, Aurora.

Naangay pay ti sabali nga on-site processing iti municipal hall ti Dingalan, Aurora idi Enero 16.

Dagiti dadduma pay a pakaipaayan ti on-site processing: provincial capitol auditorium ti Laoag City, Ilocos Norte – Pebrero 4; Candon city – Pebrero 9, ken My Metrotown Mallo, Tarlac City, Tarlac – Pebrero 11.

Kinuna ti PRC a makatulong iti dakkel kadagiti klienteda ti panangidanonda iti serbisio iti Ilocos Sur agsipud ta saandan nga agplete ken aggastos iti ipapanda iti Baguio City a yan ti opisina ti PRC para iti pannakaproseso dagiti kasapulanda. (Tawid News)

Comments are closed.