Footer

Hustisia, napardas a naipakat kontra nagtakaw iti motorsiklo

SAN ESTEBAN, Ilocos Sur – Kas kapardas iti panangitarayna iti motorsiklo a dina kukua, kasta met kabiit ti pannakaikursong iti pagbalu-dan ti maysa a bartek kalpasan ti pannakatiliwna.

Idi agarup 12:30 ti malem ti Enero 15, inreport ni Rowena Gadingan y Trinidad, 22, naasawaan, ken residente iti Barangay Poblacion Sur, iti polis nga intaray ni Sabado ti Honda XRM 125 a motorsiklo ti lakayna a ni 1Lt. Jhonior Aspa Gadingan, 27, kameng ti Philippine Army a nakadestino iti Basilan.

Mapapati a nakainom iti arak ti suspek idi intarayna ti motorsiklo a nakaparking iti sanguanan ti pagtaengan da Gadingan.

Kalpasan ti maysa nga oras, nakaawat ti San Esteban police station iti impormasion a maysa a motorsiklo nga addaan iti kaingas a deskripsion ti natakaw a lugan ti nainbolbar iti aksidente iti Barangay Poblacion, Santiago, Ilocos Sur.

Nagtungpal daytoy iti pannakatiliw ti suspek ken iti pannakarekobre ti nasao a motorsiklo.

Kabigatan, naipila iti opisina ti provincial prosecutor, Narvacan ti kaso a panagsalungasing iti RA 6539 wenno Anti-Carnapping Law maikontra ken ni Sabado.

Napilaan met a dagus ni Sabado iti kaso a panagsalu-ngasing iti RA 6539 iti korte a naipababaen iti Criminal Case No. 4257-N ket nairekomenda nga agpiansa iti P180,000.00.

Iti dayta met laeng a petsa, naipaima ti akusado iti provincial jail, Bantay, Ilocos Sur babaen ti bileg ti pammilin ni Judge Gina Juan-Chan ti Regional Trial Court, Branch 22, Narvacan, Ilocos Sur. (Tawid News Team)