Footer

Ti Agsingsingir

Sarita ni Rolando A. Seguro, Jr.

(Maikadua a paset)

Di pay nakadandanon iti sumaruno a centerna idiay Nararagan a pagsingiranna idi agkiriring manen ti nakabolsa a selponna. Inkamangna ti motorna iti sirok ti mangga iti igid ti kalsada ket kinitana no asino ti tumawtawag. Ni Pauline, ti maysa pay a nobiana.

Hello, mahal. Komustaka? Apay ma-miss-nak manen?” pinalamuyot ni Kinio ti bosesna a simmungbat.

Wen ngarud, mahal ko. Miss-ka unayen. Ngem agmadimadin toy selponko. Kunak man no ipanmo ita diay karim a Samsung a touchscreen?” insungbat ni Pauline.

Ha? Wen dika agdanag, mahal. Basta sika. Uray awan paaddaek,” impatiray-ok ni Kinio. Ngem pangalaanna koma pay ti igatangna no natalpog metten idi Biernes diay naawatna a meal ken load allowance-na agraman nabatbati iti sueldona. Managpasugnod met ngarud ni Pauline. Baybay-an latta koman ni Kinio ngem masayangan met ngamin iti kasla Maja Salvador a pintas daytoy.

Agpampanunot pay la iti remedio idi makadanon idiay Abulug a pagsingiranna. Nadlaw sa ni Manang Lita a center chief ti Buko Center a kasla maikulkuleng daytoy isu a dinamagna no adda problema ni Kinio. Ania pay pinaliday la ket ngarud ni Kinio ti langana bareng maallilawna ni Manang Lita ket tulongan daytoy iti parikutna. Sabagay, inrekomendana idi ti pannakaaprobar ti trenta mil a loan ni Manang Lita nupay ammona a di kabaelan daytoy nga iganansiaan iti panaglakona iti niog. Napintas ngamin ti balasang ni Manang Lita ket pasaray paanginan no kua ni Kinio. Kasla mayat met daytoy ta kasla tilapia nga agparagipig no kua. Isu nga idi aplayan ni Manang Lita dayta a gatad, impanamnamanan a maaprobaran.

Masapulko ngarud ti kuarta, Manang,” pinalidayna kampay idi uray ti bosesna. Ammona a kabaelanna nga allilawen ni Manang Lita. “Naospital ngamin diay kaanakak ket awan gastosenda. Siak ti namnamaenda a makatulong ngem nairana met nga awan pulos nabati iti urnongko.”

Alla, kaasika met no kasta, Sir,” kinuna ni Manang Lita. Mamati la unay ken ni Kinio. “Apay mano kadi koma ti masapulmo?”

Uray otso mil laeng koma, a, Manang. Ngem no adda kawadwadanna ket uray dies mil latta koman,” intuloy latta ni Kinio ti panagartistana.

Ay, nagdakkel met gayam, Sir. No dua ribu la koma, a, ket iwidroankan iti savings-ko ta kaasika met,” kinuna ni Manang Lita. “Ania ti makunayo, kakadua?” pagammuan ta binaw-inganna dagiti kakaduana iti center-da. “Pagtitinnulongantayon a paruaren ta masapul ni Sir, a, ta ne kaasi met. Uray ta nagalisto met a mangirekomenda no kua kadagiti aplayantayo.”

Uray interesakton, a, kakabsat. No saanak la koma ngamin a nagipit,” intuloy latta ni Kinio a kinonsensia dagiti babbaket a klientena.

Ania pay, maysamaysa nangkitan iti passbook-da no mano ti mabalinda nga iwidro agingga a naparuarda ti diesmil nga ut-utangen ni Kinio.

Tenkiu, kakabsat. Dikay agdanag ta bayadakto met la agingga no agtapos daytoy a bulan,” inluboslubosna ti panagartistana. “No awankay la ngata, diakon ammo no pagremremedioak.”

Aniaka ketdin, Sir. Kasta lang, a, ti aggagayyem. Agsisinnaranay,” dandani inkorus dagiti babbaket.

Arig pay ni Kinio ti nangabak iti hueteng iti ragsakna idi makapanawen iti center da Manang Lita. No saan la koma a nakasakay ken agpatpataray iti motor, naglagtolagto la ketdin iti ragsakna. Agasem ta naallilawna dagiti babbaket? Hahaha! inkatawa ti unegna. Gatangenna la ketdin madamdama tay selpon a pakarengreng ni Pauline. Kasla makitkitanan ti mabalin a mapasamak inton sardam no pasiarenna ni Pauline pambaranna ited ti regalona a selpon. Masiguradona, saan langen nga apros kada bisong ti ited kenkuana ti balasang. Aglalo ket turogan met latta ida no kua da Tata Mulong ken Nana Saling a dadakkel ni Pauline. Pagsanguanda ngamin no kua nga itangad ti ipasarabona a sangabote a gin. Ni Waldi met a kakaisuna a kabsat ken adien ni Pauline, saan metten a maibalbalay manipud idi nakugit ta naibarkada metten kadagiti padana a babbarito iti purokda a Letletteg. Panagrikna ni Kinio, kasla ideldeldel pay ket da Tata Mulong ti balasangda kenkuana. Naibagada pay naminsan a kayatda a manugangen. Nagpatingga la ngamin ni Pauline iti hayskul (ngem nagadu dagiti agtarigagay a makagun-od iti ayatna, wenno ti la ngata makaalino a pammagina ti kayatda?) ket kayatda ngata met a makaasawa iti deadal ken adda trabahona tapno sumayaatto met ti biagna. Sika man ti empleado iti banko, ipampannakkel met no kua ni Kinio iti bagina.

NAMINSAN, naranaan ni Kinio ti makatawen san a past due a klientena a rumrummuar iti pasdek ti Cebuana idiay Junction Luna. Nakulbet nga agbaybayad daytoy. In-inut no mangted. Ngem nakita itay ni Kinio ti panangbilangna iti kuarta a nalabit paw-it ti anakna nga adda idiay abrod. Isu a dinan ininggaan daytoy agingga a di nangted iti lima ribu.

Nagbalinen nga otso mil ti dagup ti bayadam, Manang, ta nabayagen a dika nagbayad,” kinuna itay ni Kinio iti baket. “Uray ta adda met naawatmon a paw-it diay anakmo, bayadamon ti utangmo tapno awanen parikutmo pay. Dimon urayen a suratannaka pay diay abogadomi. Ad-adunton ti bayadam no mayakar daytoy account-mo iti legal department.”

Gapu iti buteng ti baket ta abogado metten ti ibagbaga ni Kinio, nakitinnawar daytoy agingga a nagsaltekda iti lima ribu. Dimmawat ti baket iti resibo kas pammaneknek a nakabayaden daytoy. Dagdagus met nga inikkan ni Kinio. Ngem saan gayam a nakakarbon daytoy ket idi makapanawen iti ayan ti siningirna, sinuratanna ti duplicate ti resibo ngem saanen a lima ribu no di ket dua ribu langen ti insuratna dita. Siiisem a nangilasin iti tallo ribu ket inkargana iti waletna.

Manmano a pasiaren ti superbisorna dagiti nabayagen a past due a klienteda sa no agpasiar man, kanayon met a dina maranaan ti baket a siningirna. Kasano koma ngarud a maammuanda ti inaramidna? Perminto ketdi a yaman ti superbisorna, a, ta nasarakan ken nasingirna pay daytoy a klienteda.

Nabayagen nga ar-aramidenna ti kasta. Nga agsabali ti nakasurat iti orihinal ken iti duplicate ti resibo. Nakaadun. Ngem dida met masukalan. Adda pay no kua dagiti singirenna ngem ipambarna a naibusan iti resibo. Siempre dina met i-remit dagita. Saan met a makapagreklamo idiay opisina dagiti agbayad a dina resibuan ta awan met maipakitada a pammaneknek a nagbayadda.

Nagparikut manen ni Kinio idi madanon ti karina a panagbayad kadagiti utangna iti center da Manang Lita. Pinadasna nga inulit idiay Ballesteros ti taktikana. Iti Bountiful Center nga idauluan ni Manang Edna. Gapu ta maasianda iti kasla nakappapati a panagartistana, inwidroanda met kadagiti depositoda. Ania ngarud, bagi manen ni Kinio ti umis-isem idi makapanaw iti dayta a center. Naglaka gayam nga allilawen dagiti babbaket, iyay-ayek-ekna.

(Maituloyto)

Comments are closed.