Footer

Traysikel, dimmungpar iti kayo; drayber, natay iti ospital

SAN ILDEFONSO, Ilocos Sur – Mapapati a tapno makauna iti pagparkingan iti sanguanan ti Philippine Science High, inusar ti biktima ti short cut lane ngem saanna metten a nakontrol ti luganna a puon ti nakadungparanna iti maysa a kayo iti igid ti kalsada.

Naireport iti police station ditoy a napasamak ti aksidente iti barangay road a sakup ti Poblacion East ditoy nga ili idi agarup 11:45 ti bigat ti Enero 12.

Naitaray ni Amado Tamano y Pagador, 56, awanan asawa, ken residente iti Barangay Naglaoaan, Sto. Domingo, Ilocos Sur iti Northside Doctor’s Hospital, Guimod, Bantay ngem idi agarup 12:20 iti bigat ti Enero 15, pimmusay ti biktima.

Iti inisial a panagimbestiga dagiti polis, agpadaya ti napegges ti taray ti Honda TMX 155 a traysikel a minaneho ni Tamano ket iti asideg ti pagkurbaan ti nadakamat a lugar, inobertekan ti biktima ti maysa a traysikel nga inusarna ti short cut lane ngem mapapati a saanna a nakontrol ti manibela a puon ti nakadungparanna iti mahogany tree nga adda iti abagatanen a paset ti kalsada.

Kabayatanna, natuntonanen dagiti inbestigador ti akinkukua iti kotse a nangtaray iti nadungparna a motorsiklo sadiay Barangay Aggay, Bantay idi rabii ti Enero 12 a puon ti nakadundunoran ken nakaiyospitalan dagiti tallo a naglugan iti motorsiklo.

Iti kaudian a report manipud iti Bantay police station, kas resulta iti pannakikoordinarda iti Land Transportation Office, naberipikada a nakarehistro ti kotse a mapapati a nainbolbar iti nasao a pannungpar nga addaan plate number XPF-343 ken ni Richard Oliver Sy Gan, #25 Tandang Sora, Kalookan City.

Segun iti polis-Bantay, mapatulodan ni Oliver iti surat/summon nga agreport iti police station tapno mapagsaludsodan mainaig iti kotsena a Mitsubishi Lancer JT GLS 1 nga addaan plate no. XPF-343.

Maipalagip nga idi agarup 8:00 ti rabii ti Enero 12, agdaldaliasat nga agpalaud iti national highway ti Barangay Aggay, Bantay, Ilocos Sur ti Mio motorcycle a minaneho ni Florante Tangonan y Riduca Sr, 44, naasawaan, ken residente iti Pudoc Centro, San Vicente, Ilocos Sur, kasakayna dagiti kalugaranna a da Hazel Clarisse Tapiseria y Bundoc, 18, balasang, ken Jerome Tapiseria y Bundoc, 15 idi dinungpar ti kotse a naggapu iti kasungani a direksion a nakaigapuan iti pannakadundunor dagiti tallo a biktima ken nakaiyospitalanda iti Northside Doctor’s Hospital.

Ngem imbes a sinardengan ti naglugan iti kotse dagiti biktima, naglibas ketdi a dagus kalpasan ti insidente. (Tawid News Team)